Qazaqstanda elektr energiiasynyń tarifi qazirgi deńgeiden birneshe ese ósip, bir kilovatt-saǵat úshin 100 teńgege deiin jetýi múmkin. Mundai pikirdi Qazaqstannyń energiiamen jabdyqtaýshy uiymdar qaýymdastyǵynyń tóraǵasy Sergei Agafonov aitty, dep habarlaidy dalanews.kz.
Ulys Media aqparaty boiynsha, Astanada ótken «Ortalyq Aziianyń jylý energetikasy» halyqaralyq forýmynda sala ókili kommýnaldyq tarifterdiń qazirgi júiesi teńgerimsiz ekenin málimdegen. Onyń aitýynsha, turǵyndar úshin tómen tariftiń salmaǵyn memlekettik uiymdar kóterip otyr.
«Qazir halyq úshin tómen tariftiń qunyn memlekettik uiymdar tólep otyr. Uzaq ýaqyt boiy Shymkentte turǵyndar men uiymdar úshin jylý tarifiniń aiyrmashylyǵy 17 ese bolyp kelgen edi. Endi jańa “kóshbasshy” – Qaraǵandy oblysyndaǵy Abai qalasy. Munda aiyrmashylyq 21 esege jetti. Iaǵni turǵyndar turatyn kópqabatty úi aiyna jylý úshin 4 myń teńge tólese, dál qasyndaǵy mektep milliondaǵan teńge tóleidi. Bul qarajat bilim berý sapasyn jaqsartýǵa nemese basqa da mańyzdy maqsattarǵa jumsalýy kerek edi. Biraq is júzinde kórshi turǵyn úidiń tómen tarifin sýbsidiialaýǵa ketip jatyr», – dedi Sergei Agafonov.
Onyń pikirinshe, bul aiyrmashylyqty joiý úshin tarifterdi kezeń-kezeńimen kóterý qajet. Ásirese, ózgeris elektr energiiasynan bastalýy tiis.
«Biz elektr energiiasynyń tarifi eń tómen 27 eldiń qataryna kiremiz. Qazaqstandaǵy elektr energiiasynyń baǵasy álemdik ortasha deńgeiden shamamen úsh ese tómen», – dedi qaýymdastyq tóraǵasy.
Sergei Agafonovtyń aitýynsha, Qazaqstandaǵy «ádil tarif» bir kilovatt-saǵat úshin 100 teńge bolýy kerek.
«Qazaqstandaǵy elektr energiiasynyń tarifi 100 teńge bolýy tiis. Bul – osy resýrstyń naqty qunyna sáikes keletin ádil tarif», – dedi ol.
Forým barysynda sarapshy tarifterdiń infliatsiiaǵa áseri týraly pikirge de toqtaldy. Onyń sózinshe, tarifterdiń ósýiniń infliatsiiaǵa yqpaly asyra baǵalanyp otyr.
«Statistika úshin tabiǵi monopoliialar qyzmetiniń qymbattaýyn esepteý áldeqaida ońai. Al dál sol ýaqytta aitarlyqtai qymbattap ketken kartop siiaqty taýarlardyń áserin esepteý kúrdelirek», – dedi Agafonov.
Sondai-aq ol tarifterge moratorii jariialaý máseleni sheshpeitinin aitty.
«Tarifterdi ýaqytsha toqtatý máseleni keiinge shegeredi. Sonyń saldarynan keiin ósim odan da joǵary bolady. Iaǵni tarif 10 paiyz emes, 15 paiyzǵa ósedi. Bul – óte qarapaiym nárse. Jarty jyldyq moratoriiden keiin de osy saldarmen qaita betpe-bet kelemiz», – dedi ol.
Energetiktiń pikirinshe, tariftiń ósýi halyqty energiiany únemdeýge de yntalandyrady.
«Eki jol bar: ne jańa energiia óndiretin qýattardy salý, ne elektr men jylýdy únemdeý. Ekinshi jol áldeqaida tiimdi. Tarifti kótermei turyp, halyqqa energiiany únemdeý mádenietin qalyptastyrý múmkin ekenine meni eshkim sendire almaidy», – dedi Sergei Agafonov.
Aita keteiik, buǵan deiin Ulttyq bank tarifterdiń kúrt ósýi infliatsiiany qaita jedeldetýi múmkin ekenin eskertken bolatyn. Sonymen qatar 1 shildeden bastap eldegi 60 eldi mekende elektr energiiasynyń tarifin qaita kóterý josparlanyp otyr.
