Túrkistanda eki balanyń denesi jaldamaly páterden tabyldy. Polıseıler olardyń anasyn, Qyzylorda oblysynyń turǵynyn izdestirip jatyr, dep habarlaıdy Dalanews.kz.
Túrkistan oblysy polısıa departamenti málimetinshe, 7 aqpanda jaldamaly páterlerdiń birinen eki balanyń denesi tabylǵan. Bul fakti boıynsha qylmystyq is qozǵaldy.
"Ólim sebebin anyqtaý úshin balalardyń deneleri saraptamaǵa jiberildi. Qazirgi ýaqytta oqıǵanyń barlyq mán-jaıyn anyqtaý jáne balalardyń kóz jumǵany jáne olardyń mekenjaıy týraly dosyna habarlaǵan Qyzylorda oblysynyń turǵyny, balalardyń anasynyń turǵan jerin anyqtaý maqsatynda qajetti jedel-izdestirý sharalary júrgizilýde. İstiń tergeý barysy meniń jeke baqylaýymda", - dedi Túrkistan oblystyq PD bastǵy Murat Qabdenov Facebook-tegi paraqshasynda.
Al, oblystyq polısıa departamenti turǵyndardan jalǵan aqparat taratpaýdy surady.
"Biz jalǵan aqparat taratqany úshin jaýapkershilik bar ekenin eskertemiz jáne azamattardy resmı derekkózderden alynǵan aqparatqa senýge shaqyramyz", - delingen habarlamada.
