Túrkistan soty belsendi ári «S-INFORM» gazetiniń ókili Qural Seiithanuly Ismanovty derbes derekterdi zańsyz taratqany úshin úsh jylǵa bas bostandyǵynan aiyrdy, dep habarlaidy dalanews.kz.
8 qyrkúiekte Túrkistanda belsendi Qural Seiithanuly Ismanovqa qatysty sot úkimi shyqqan. Bul týraly jýrnalist Amangeldi Batyrbekov málimdedi.
Seiithanuly biyl mamyr aiynda bloger Lázzat Asanovanyń aryzynan keiin ustalǵan. Asanova belsendini óziniń jeke derekterine qatysty aqparatty taratty dep aiyptaǵan.
Jýrnalist Amangeldi Batyrbekovtiń aitýynsha, Ismanov jariialaǵan málimetter qupiia aqparat bolmaǵan. Onyń sózinshe, bul derekter buǵan deiin áleýmettik jelilerde de jariialanǵan.
Sot úkimi jariialanǵannan keiin Lázzat Asanova istiń adamnyń jeke ómiri men derbes derekterin qorǵaý quqyǵyna qatysty ekenin aitty.
Onyń pikirinshe, adamnyń jeke derekterin onyń kelisiminsiz taratý faktisin jai ǵana áleýmettik jelidegi jazba retinde qarastyrýǵa bolmaidy.
Quqyq qorǵaý uiymy «Ádil sóz» buǵan deiin jýrnalister men belsendilerge qatysty isterde jariialanǵan aqparattyń buryn ashyq derekkózderde bolǵan-bolmaǵany jáne ony alǵash taratqan tulǵalardyń jaýapkershiligi máselesi de mańyzdy ekenin atap ótken. Uiym jýrnalisterdi qylmystyq qýdalaý kezinde zańdylyq, quqyqtyq aiqyndyq jáne zań aldyndaǵy teńdik qaǵidalary saqtalýy qajet ekenin málimdegen.
