Oǵan zıaly qaýym, ólketenýshylar, basqarma basshylary, qoǵam belsendileri, ustazdar men ǵalymdar jáne BAQ ókilderi qatysty. Jıyndy Túrkistan oblystyq İshki saıasat basqarmasynyń basshysy Beısenbaı Tájibaev ashyp, júrgizip otyrdy. Ol oblysta «Rýhanı jańǵyrý» baǵdarlamasyn júzege asyrý baǵytyndaǵy jumystarǵa toqtaldy.
– Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń jarıalanǵanyna bir jyldan astam ýaqyt ótti. Osy ýaqyt ishinde Túrkistan oblysynda «Rýhanı jańǵyrý» baǵdarlamasynyń barlyq basym baǵyttary boıynsha naqtyly jumystar atqaryldy.
Oblys ákimi Janseıit Túımebaevtyń tikeleı tapsyrmasymen el rýhanıatyna serpin beretin jobalar qolǵa alyndy. Oblysta óńirlik komısıa, sarapshylar keńesi men Jobalyq keńse qurylyp, is-sharalar jospary bekitildi. Túrkistan oblysynyń tarıhı jáne týrısik oryndary jóninde aǵylshyn, qazaq jáne orys tilderinde arnaıy rolıkter ázirlenip jatyr.
Bıyl Túrkistan oblysynyń 25 qalamgeriniń jeke saıttary ázirlenip, óńirdegi 10 aqyn-jazýshynyń kitaptary shyǵarylady. Bul rýhanıat salasyna oń áser beredi degen senimdemiz. «Bolashaqqa baǵdar: rýhanı jańǵyrý» aıasynda 3 anımasıalyq jáne 1 kınofılm túsirilip, respýblıkalyq deńgeıdegi 10 sarapshynyń zertteý maqalasy ázirlenedi. Atap aıtsaq, «Ordabasy – birliktiń týy», «Oqsyz oqıǵasy», «Túrkistan» múltfılmderi men «Tólebı» fılmi túsirilip jatyr. Sonymen qatar, «Tańbaly tastar – babalar izimen» Túrkistan Qarataý jotasy boıynsha baspasóz týry ótkizilip, «Ólketaný» oblystyq saıty ashylady. Taǵy bir aıta keterligi, «Tańǵajaıyp Túrkistan» atty áleýmettik jeli qoldanýshylarynyń baıqaýy uıymdastyrylady. «Rýhanı jańǵyrý» – birneshe jylǵa ǵana arnalǵan emes, úzdiksiz jumys isteýdi talap etetin baǵdarlama, – dedi basqarma basshysy.
Basqosýda "Rýhanı jańǵyrý" jobalyq keńsesiniń jetekshisi Baqytjan Áshirbekov 8 aıda atqarylǵan jumystardy baıandady. Onyń aıtýynsha, Túrkistan oblysynda «Rýhanı jańǵyrý» baǵdarlamasynyń 6 basymdyǵy, ıaǵnı básekelik qabilet, pragmatızm, ulttyq biregeılikti saqtaý, bilimniń saltanat qurýy, Qazaqstannyń revolúsıalyq emes, evolúsıalyq damýy, sananyń ashyqtyǵy negizinde 6 arnaıy joba ázirlenip, naqty is-sharalar júzege asyrylǵan. Jobalyq keńsede 46 joba ázirlenip, 168 is-shara qolǵa alynǵan.
Bıyl Túrkistan oblysynyń shejireli oryndary týraly ańyz-áńgimeler jınaǵy jáne oblystyń týrızmi men tarıhynan syr shertetin fotoalbomdar daıyndalyp jatyr. Dálirek aıtsaq, Ońtústik óńiriniń ańyz-ápsanalarynan jınaq shyǵarylsa, «Túrkistannyń kóne qalalary», «Túrkistannyń tańǵajaıyp tabıǵaty» fotoalbomy jaryq kórmek.
Jıynda «Ólketaný» jobasynyń avtorlarynyń biri, tarıhshy ustaz Ómir Shynybekuly, «Iýjnyı Kazahstan» gazeti bas redaktorynyń orynbasary Keńesbaı Ismaılov, «Ońtústik Qazaqstan» gazetiniń dırektor - bas redaktory Abaı Balajan, belgili shejireshi-qalamger mombek Ábdiákimuly men «Qazaqstan joly» gazetiniń bas redaktory Ońǵar Tájıevtiń pikirleri tyńdaldy. Sonymen qatar, ózge de azamattar óz oılaryn ortaǵa salyp, «Rýhanı jańǵyrý» baǵdarlamasyn tıimdi júzege asyrý jónindegi usynystaryn aıtty. Usynystar men oılardyń mańyzdylary eskerilip, óńirlik Jobalyq keńseniń jumys josparyna engiziledi.
Túrkistan oblysy ákiminiń baspasóz qyzmeti
