Túrkistan qalasy mádenıet pen rýhanıattyń ortalyǵyna aınalyp keledi. Sonyń dálelindeı, 5 jeltoqsanda Túrkistandaǵy «Kongres Hol» kópsalaly kesheninde KSRO-nyń jáne Qazaqstannyń halyq ártisi Álibek Dinishevtiń mereıtoılyq konserti ótti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Kóńildi sergitip, án álemine jetelegen óner keshinde ánshi qazaq jáne álem kompozıtorlarynyń klasıkalyq ánderin shyrqady. Atap aıtsaq, halyq ánderimen qatar Abaı Qunanbaıuly, Jaıaý Musa, Tólegen Muhamedjanovtyń shyǵarmalary oryndaldy. Sonymen birge Matveı Blanter, Arno Babadjanán jáne ózge de asa daryndy óner ıeleriniń áýenderinen shashý shashty.

Bıyl mereıli 70 jasqa tolǵan Álibek Dinishev – qazaq án ónerin álemdik deńgeıde tanytqan tulǵalardyń biri. Mereıtoı ıesi Túrkistandaǵy oń ózgeristerge joǵary baǵasyn berip, óner keshine arnaıy kelgen ánsúıer qaýymǵa rızashylyǵyn bildirdi.