Túrkistan oblysynda rezonans týdyrǵan oqiǵaǵa qatysty Ishki ister ministrligi jańa málimet jariialady, dep habarlaidy Dalanews.kz.
Ishki ister ministriniń orynbasary Sanjar Ádilovtiń aitýynsha, qylmystyq is qozǵalyp, kúdikti qamaýǵa alyndy.
“Atalǵan fakt boiynsha qylmystyq is qozǵaldy. Kúdikti qamaýǵa alyndy. Tergeý júrip jatyr. Ol kisiniń áieliniń ústinen de qylmystyq is qozǵaldy. Oǵan da qatysty tergeý amaldary júrip jatyr. Tergeý ýaqytynda olardyń balalary týystarynyń qolynda turyp jatyr. Qazir tergeý amaldaryn qadaǵalap otyrmyz. Tolyq tergeý júrgizilip, qylmystyq is sotqa joldanady”, – deidi IIM orynbasary.
Eske salaiyq, áleýmettik jelide Túrkistan oblysy Shardara aýdanynda qartaiǵan ákesin balasy aiaýsyz soqqyǵa jyqqany túsirilgen video taraǵan bolatyn.
Kadrdan balasy men kelini sóilei almaityn, ózdiginen júrip-tura almaityn qariiany kóshede jáne úi aýlasynda súirep júrgenin kórýge bolady. Uly ákesin balaǵattap, júre almaǵany úshin birneshe ret uryp-soqqan. Soqqydan qariianyń aýzynan qan ketkeni baiqalady. Biraq qariia esh qarsylyq bildirmeidi, al kelini arasha túspeidi.
Jelide bul jaǵdai qyzý talqylanyp, úlken rezonans týdyrdy.
Aita keteiik, buǵan deiin Túrkistan oblysy Shardara aýdanynda ákesin qan-josa etip sabaǵan er adamǵa qatysty tyń derek shyqqan edi.
Áleýmettik jelide er adam jergilikti meshit azanshysy bolyp qyzmet etetini habarlanǵan bolatyn.
Alaida Túrkistan oblysynyń bas imamy Erjan Tólepovtiń sózinshe, er adam Qazaqstan musylmandary dini basqarmasynyń din qyzmetkeri emes;
"Ol meshitte eshqashan azan aitpaǵan jáne resmi dini qyzmet atqarmaǵan. Onyń qyzmeti din salasyna qatysy joq, qosymsha toi júrgizýshi (tamada)", - deidi Tólepov.
Qazaqstan musylmandary dini basqarmasy mundai áreketterdi qatań aiyptaidy. Sonymen birge, ata-anaǵa qurmet – árbir musylmannyń basty mindeti ekenin qalyń jurtshylyqtyń esine salady.
