– Memleket basshysynyń Jarlyǵyna sáikes Túrkistan oblysy men Shymkent qalasynda tótenshe jaǵdai toqtatyldy. Soǵan bailanysty bizdiń oblysymyzdaǵy qyryqtan astam blok beket alynyp tastalady. Biraq Jambyl jáne Qyzylorda oblysymen shekaralas aýmaqtaǵy blok beketter ázirshe qalady. Óitkeni ol óńirlerde tótenshe jaǵdai rejimi áli alynǵan joq. Aýdanaralyq bekettiń bári jumysyn toqtatty. Turǵyndarǵa, jolaýshylarǵa erkin jol júrýge múmkindik beriledi. Jalpy tótenshe jaǵdai kezinde blok beketter arqyly biraz nátijelerge qol jetkizdik. 30 myńdai avtokólik tekserildi. Birazynan Almaty, Shymkent qalalarynda bolǵan oqiǵalarǵa qatysqan, qarý-jaraqpen júrgen azamattar ustaldy. Oblys boiynsha 16 qylmystyq is qozǵalǵan. Beibit sherýge qatysqandarǵa túsindirme jumystary júrgizildi, keibirine ákimshilik shara qoldanylyp, bári úilerine qaitaryldy. Jaǵdai tolyǵymen turaqtaldy, – dedi Ómirzaq Shókeev.
Oblys basshysy dástúrge sai aýdanǵa sapar barysynda jergilikti ardagerler, ziialy qaýym ókilderi, belsendi turǵyndarmen kezdesý ótkizdi. Jiynda óńir basshysy «Prezidentimizdiń tapsyrmasyna sáikes elimizde janar jaǵarmaidyń baǵasy turaqtaldy. Endigi kezekte qymbatshylyqqa, jumyssyzdyqqa qarsy is-sharalardy jandandyra túsýimiz kerek. Ásirese jastardy kásipkerlikke baýlýdyń mańyzy zor. Árine jurttyń bári kásipker bola almaidy. Biraq jergilikti jastardyń arasynan kásipkerlikke beiim jastardy izdep taýyp, olardyń ideialaryna qoldaý bildirgen jón.
Jastarǵa jaǵdai jasalsa, olar da turǵyndardy jumyspen qamtyp, el damityn bolady. Elimizde damýǵa, eńbek etýge tolyq múmkindik bar. Aýyl sharýashylyǵyn damytý, onyń ishinde sýdy únemdeitin tásilderdi batyl júzege asyrý qajet. Jalpy oblysymyzda gazdandyrý, infraqurylymyn jaqsartý jumysy júrip jatyr. Túrkistan qalasyna aǵyn sý tartý kózderin taptyq. Sý qoimalary salyndy. Birlesip jumys istesek, eldiń de eńsesi tiktele túsetini anyq» dei kele jergilikti turǵyndardyń ótinishteri men usynystaryn tyńdady. Sonymen birge elimizde koronavirýs indeti qaita kúsheigenin aityp, sanitarlyq talaptardy qatań saqtaý kerektigin de atap ótti.
Ordabasylyqtar aǵyn sý, jumyspen qamtý jáne ózge de máselelerdi qozǵady. Birlik pen yntymaqtyń týy tigilgen Ordabasy óńiriniń turǵyndary, el aǵalary el tynyshtyǵynyń mańyzdy ekenine toqtalyp, oblysta qolǵa alynǵan jobalarǵa sáttilik tiledi. Óńir basshysy osy kúni aýdan ortalyǵynda ashylǵan halyqqa qyzmet kórsetý ortalyǵynda boldy. Oǵan jańa tehnologiialardyń kómegimen júzege asyp jatqan múmkindikter tanystyryldy. Sondai - aq oblys ákimi
Shubarsý aýylyndaǵy B.Nurlybekov atyndaǵy jalpy orta mektebiniń jańadan salynǵan 200 oryndyq oqý korpýsymen tanysty. Bul mektep aýylǵa Ózbekstannan qandastardyń kóptep kóship kelýine jáne demografiialyq ósimniń joǵarylaýyna bailanysty jańartylyp, keńeitilip otyr.
