4 maýsym – Qazaqstan Respýblikasynyń Memlekettik rámizder kúni qarsańynda yntymaǵy men birligi jarasqan Sozaq aýylynyń jastary igilikti istiń jarshysy boldy. Atalǵan aýyldaǵy Sozaq jalpy orta mektebi gimnaziiasynan 20 jyl buryn túlep ushqan azamattar aýylǵa kireberis tustaǵy «Jastar» saiabaǵynyń aldyna biiktigi 25 metrlik «Tý tuǵyryn» ornatyp, «Rámizder alleiasyn» tartý etti.
Búgin merekege orai Sozaq aýyldyq okrýgi ákimdigi men aýyl jastarynyń uiymdastyrýymen atalǵan alleiada Memlekettik tý kóterilip, Ánuran shyrqaldy.
– «Saýsaq birikpei, ine ilikpes» degen ulaǵatty sóz bar dana halqymyzda. Týǵan jerge titimdei bolsa da jaqsylyq jasaý – bizdiń perzenttik paryzymyz. Eltańba, Tý, Ánuran – bul Táýelsizdigimizdiń basty simvoldary. Synyptastarmen aqyldasa kele, patriottyq rýh syilaityn ári ózimizdiń artymyzdan erip kele jatqan keiingi jastarǵa úlgi bolsyn degen nietpen osyndai tartý jasaýdy jón kórdik. Aldaǵy ýaqytta da aýyldyń kórkeiip, gúldenýine atsalysamyz, – deidi ol.
Aýyl turǵyndary da ósken ólkesine qurmetpen qaraǵan túlekterge dán riza. Aýyl okrýginiń ákimi Batyrhan Aiapov túlekterge alǵysyn aityp, aýyldyń ajarlanýyna jumyla qoldaý kórsetip júrgen azamattardyń isi kópke úlgi ekenin jetkizdi.
Eske sala ketsek, biyl bilim ordalaryndaǵy sońǵy qońyraý qarsańynda oblysta 20 jyl buryn mektep bitirgen túlekter 6 baspana, 1 alleia, 1 aialdama jáne 1 sport keshenin syiǵa tartty.
