Búgin Túrkistan oblysynyń ákimi Janseıit Túımebaevtyń ókimimen QR Prezıdenti ákimshiliginiń jáne Túrkistan qalalyq máslıhatynyń kelisimimen Túrkistan qalasy ákimi laýazymyna Álipbek Sháripbekuly Óserbaev taǵaıyndaldy.
Oblys basshysy qala aktıvin oblys ortalyǵy bolyp Túrkistan qalasynyń bekitilýimen quttyqtap, shahar basshysyn tanystyrdy.
Á.Óserbaev 1961 jyly týǵan, bilimi joǵary, mamandyǵy boıynsha biliktiligi ınjener-hımık-tehnolog. Eńbek jolyn 1983 jyly Qaraǵandy asbes-sement ónimderin shyǵaratyn zaýytynyń mashınısti retinde bastaǵan.
1986-2014 jyldary Túrkistan qalasy qurylys detaldary men konstrýksıalary kombınaty zerthanasynyń ınjeneri, masteri, ekonomısi, seh bastyǵy, bas ınjeneri, «Qýat Sýındýstrıa» AQ, «KazakhConstruction Industry» AQ Túrkistan qalasy rýdasyz materıaldar kombınaty fılıaldarynyń dırektory, Túrkistan qalalyq máslıhaty hatshysynyń mindetin ýaqytsha atqarýshy, Túrkistan qalasy qurylys bóliminiń meńgerýshisi, Kentaý, Túrkistan qalalary ákimderiniń orynbasary, Túrkistan qalasynyń ákimi, oblystyq kásipkerlik jáne ındýstrıaldy-ınnovasıalyq damý basqarmasynyń basshysy, Ońtústik Qazaqstan oblysy Túrkistan qalasynyń ákimi bolyp laýazymdaryn atqarǵan.
2017 jyldyń jeltoqsan aıynan bastap Ońtústik Qazaqstan oblysy ákiminiń birinshi orynbasary laýazymynda qyzmet etip keldi.
Óńir basshysy Janseıit Qanseıituly tarıhı ári syndarly kezeńde Túrkistan qalasynyń ákimine jáne ákimdik qurylymdaryna artylatyn jaýapkershiliktiń júgi aýyr ekendigin jetkizdi.
«Túrkistanǵa «tek qazaq eliniń ǵana emes, búkil túrki jurtynyń zıarat jasaıtyn qasterli orny», - dep baǵa bergen Elbasy onyń rýhanı ómirinde Qoja Ahmet Iasaýı kesenesiniń úlken orny bar ekenin, tarıhy tereń Túrkistannyń týrızm úshin de mańyzdylyǵy erekshe ekendigin jáne qalanyń toǵyz joldyń torabynda ornalasýy syrtqy jáne ishki týrıser men jergilikti turǵyndar úshin qolaıly ekendigin basa aıtty, demek osy múmkindikterdi tıimdi paıdalaný qajet», - dedi oblys ákimi.
Sondaı-aq, qala ákimine Túrkistan qalasynyń Bas josparyn tezdetip ázirleýdi, zaman talabyna saı qalanyń damý dınamıkasyn odan ári arttyrýǵa qajetti baǵyttardy jetildirýdi jáne turǵyndar men týrıserge qolaıly jaǵdaı jasaý maqsatynda qalanyń ınfraqurylymyn qalyptastyrýdy tapsyrdy.
Budan ózge, óńir basshysy Janseıit Qanseıituly ındýstrıaldy aımaqta ornalasatyn ınovasıalyq-ınvestısıalyq jobalardy kóptep tartý, shaǵyn jáne orta bıznesti jetildire otyryp, óndiristi damytý, qalanyń logıstıkalyq múmkindigin arttyrý, qalany týrızm ortalyǵy retinde damytý boıynsha naqty sharalardy qabyldaý qala ákiminiń basty ustanymy bolýy kerektigin aıtty.
«Eń bastysy Túrkistandy elimizdiń rýhanı tiregi ekendigin umytpaýymyz qajet. Osy turǵyda búkil túrki álemi kóz tikken jaýhar qaladaǵy árbir ótkizilgen is-sharalar men tarıhı oqıǵalar egemen elimizdiń mereıi ekendigi árqashanda jadymyzda bolýy tıis», - dep túıindedi oblys ákimi.
Jıyn sońynda óńir basshysy Janseıit Túımebaev tarıhı kezeń toǵysynda Túrkistan oblysynyń áleýmettik-ekonomıkalyq damýyna úles qosyp júrgen bir top belsendi azamattardy marapattady.
