Túrkistan oblystyq tótenshe jaǵdailar departamentiniń basshylyǵy shyǵyn kólemin anyqtaý úshin Kentaý men Saýran aýdanynda jergilikti deńgeidegi tótenshe jaǵdai jariialaý týraly usynys kóterdi.
Jalpy, jyl basynan beri Túrkistan oblysy ákimi Darhan Satybaldynyń tapsyrmasymen barlyq aýdan, qalada sý tasqynyna qarsy jumys kúsheitilgen bolatyn. Turaqty talqylanyp, árbir aýdan, qala ákimine naqty mindetter júkteldi.
Aýa raiynyń aldyn ala boljamy nazarǵa alynyp, qaýipsizdik nyǵaiyp, aryqtar men atyzdar, kanaldar tazalandy.
Oblys ákimi Darhan Satybaldy Saýran aýdany men Kentaý qalasyndaǵy sý basqan birneshe eldi mekendi aralap, turǵyndarmen kezdesti. Orańǵai, Qusshy ata aýyldaryn aralady. Kóshelerden sý qashyrtý jumystaryn kórdi. Tótenshe jaǵdai departamentiniń ókilderimen birge jergilikti turǵyndarmen júzdesti.
– Jaýyn-shashynnyń mólsherden tys kóp túsýi, aýa raiynyń kúrt jylynyp, qardyń erýi osy jaǵdaiǵa ákeldi. Turǵyndardyń qaýipsizdigi men amandyǵy mańyzdy. Bul jaǵdaida sabyr kerek. Eń bastysy, el aman. Barlyq aýdan, qaladaǵy jaǵdai baqylanyp, tiisti jumystar atqarylyp jatyr. Irrigatsiialyq júieler ashylyp, kanaldar tazartylǵan. Jaǵdai baqylaýda, – dedi Darhan Satybaldy.
Qarnaq aýylynda qarǵyn sýdy bógep, baǵytyn burý jumysy júrip jatyr. Turǵyndar ózderine arnaiy kelip, jaǵdaiyn surap, eldiń arasynan tabylǵan oblys ákimine rizashylyqtaryn bildirip, sý tasqyny zardabyn joiý jumystary boiynsha usynystaryn jetkizdi.
Darhan Satybaldy Saýran aýdanyndaǵy Shaǵa aýylyndaǵy birneshe aýmaqty aralap kórdi. Jaýyn-shashynnyń toqtaýyna bailanysty sý deńgeii tómendegen. Degenmen qaýipsizdik sharalary kúsheitiledi.
Jaýyn-shashyn kóp túsýine jáne qardyń erýine bailanysty Báidibek, Saýran, Ordabasy aýdandaryndaǵy birneshe aýyldaǵy úilerdiń aýlalaryn sý basty.
Erigen qar sýy men jańbyr sýy 19 eldi mekendegi kósheler men aýla ýchaskeleri arqyly aǵyp ótti.
Qazirgi tańda 21 kóshe, 234 aýla, 1 turǵyn jeke úige sý kirgen. TJD kúshimen sý basqan aýla aýmaǵynan 200-den astam adam evakýatsiialanǵan. Ol adamdar týystarynyń úilerine jaiǵasty. Halyqty evakýatsiialaý jáne ýaqytsha ornalastyrý úshin Saýran aýdanynda 4 evakýatsiialyq pýnkt daiyndaldy.
Túrkistan oblysy tótenshe jaǵdailar departamentiniń bastyǵy Nurǵali Júnisovtiń aitýynsha, jańa jyldan beri sý tasqynynyń aldyn alý baǵytynda júieli jumys júrgizilgen.
Ákimdikter men departamenttiń birlesken is-áreketi arqyly jaǵdai baqylaýǵa alynyp otyr.
Búginde Túrkistan oblysynyń sý basý qaýpi bar aimaqtary men sý nysandarynda 24 saǵattyq kezekshilik uiymdastyrylǵan. Sýdyń deńgeii jáne eldi mekenderdi qarǵyn sýdan saqtaý jumystary turaqty qadaǵalaýǵa alynǵan.
