Investitsiialyq sýbsidiia men jeńildetilgen nesie turaqty túrde berilip, óńirde balyq óndirý kólemi 30 myń tonnaǵa jetkizý kózdelýde.
Bul másele Túrkistan oblysynyń ákimi Darhan Satybaldynyń tóraǵalyǵymen oblystaǵy balyq sharýashylyǵy salasyn damytý boiynsha jinalysta jan-jaqty pysyqtaldy. Basqosýda oblys basshysy bul baǵytta jumysty shiratyp, eksporttyq áleýetti kóterýge basymdyq berýdi tapsyrdy.
Búginde óńirde jergilikti mańyzy bar 104 sý aidyny bar. Budan bólek 4 halyqaralyq mańyzy bar, 4 respýblikalyq mańyzy bar kásipshilik maqsattaǵy ýchaskeler bekitilgen.
Taýarly balyq ósirýmen oblysta 156 kásipkerlik mekeme ainalysýda. Oblys turǵyndaryn balyq ónimderimen tolyq qamtamasyz etý maqsatynda 30 toǵandy balyq sharýashylyǵy, onyń ishinde 4-eýi úiirgelik aýlada ashyldy. Sonymen qatar jalpy qýattylyǵy jylyna 15 myń tonnany quraityn 7 balyq óńdeý zaýyty jumys isteidi.
Tabiǵi resýrstar jáne tabiǵat paidalanýdy retteý basqarmasynyń basshysy Qairat Abdýalievtiń baiandaýynsha, oblysta 2022 jyly 6 myń 200 tonnaǵa jýyq taýarly balyq óndirilse, biylǵy jospar – 6640 tonna.
Salany damytýǵa biyl jergilikti biýdjetten 500 mln teńge bólindi. Budan bólek, investitsiialyq salymdardy sýbsidiialaýǵa respýblikalyq biýdjetten 226 mln teńge qarastyrylǵan.
