500 gektar aýmaqta ornalasatyn ónerkásiptik jylyjailar jobasy «EKO-kýltýra» kompaniiasynyń qoldaýymen júzege aspaq. Onyń ishinde aldymen kólemi 51 gektardan astam jylyjai salynady. Joba tolyq júzege asqanda 8 myńnan astam jergilikti turǵyn jumyspen qamtylady dep mejelengen.
Jańa jobaǵa salynatyn investitsiialardyń jalpy kólemi – 524 mlrd teńge bolsa, 1-kezeńine 51,6 mlrd teńge. tartylmaq. Onyń ishinde 25 mlrd teńgege 27 gektar jylyjai salý josparlanýda. Qýatylyǵy – jylyna 225 myń tonna qyzanaq ósirý.
Saltanatty jiynǵa Túrkistan oblysynyń ákimi Darhan Satybaldy, «Qazaqstan Damý Banki» AQ Basqarma tóraǵasy Nurlan Baibazarov, «KazakhInvest» AQ-nyń Basqarma tóraǵasy Meiirjan Iýsýpov, «EKO-kýltýra» agrónerkásiptik holdingi Direktorlar keńesiniń tóraǵasy Aleksandr Rýdakov qatysty. Oblys ákimi bul jobanyń asa mańyzdy ekenin, óńirde agroónerkásip klasteri damitynyn jetkizdi.
– Ózderińizge belgili, Túrkistan – respýblika halqyn jemis-kókónis ónimderimen, onyń ishinde jylyjai keshenindegi qyzanaq, qiiarmen qamtamasyz etetin negizgi óńir.
Oblysta 1569 gektar alqapta 3366 birlik jylyjai bar nemese respýblikadaǵy jylyjailardyń 71 paiyzy ornalasqan. Onda 12 myńnan astam adam eńbek etedi.
Óńirdegi jylyjailardyń 87 gektary – óndiristik, al 1482 gektary fermerlik jylyjailar. 2015 jylmen salystyrǵanda osy salaǵa tartylǵan investitsiia kólemi 7 esege ulǵaidy, byltyr 74,7 mlrd teńgege jetti.
«EKO-kýltýra» kompaniiasynyń elimizge investitsiia salýy biz úshin úlken mártebe. Bul jobany jan-jaqty qoldaýǵa daiynbyz. Jobany iske qosý, óńirde ishki naryqty otandyq ónimdermen qamtamasyz etý kólemin arttyrýǵa, jańa jumys oryndarynyń ashylýyna jáne halyqtyń ál-aýqatyn kóterýge óz septigin tigizedi, – dedi oblys ákimi Darhan Satybaldy.
Reseilik «EKO-kýltýra» agrónerkásiptik holdingi Direktorlar keńesiniń tóraǵasy Aleksandr Rýdakov ta quttyqtaý sóz sóilep, jobanyń mańyzdylyǵyna toqtaldy. Bul áriptestik agrosalany damytýǵa serpin beretinin atap ótti. Jergilikti halyqty turaqty jumyspen, joǵary jalaqymen qamtýǵa astalysatyndaryn málim etti.
Keles aýdany, Birlik aýylynda júzege asatyn jobanyń birinshi kezeńiniń qurylysy 2024 jyly tamyz aiynda aiaqtalady dep josparlanǵan. Al búkil joba 2027 jyly júzege asyrylmaq. Birinshi kezektegi jumys oryndarynyń sany – 1000.
Jylyjai megakesheniniń jobasy seriktes «EKO-kýltýra» agroónerkásiptik holdinginiń qazaqstandyq «Green Land Alatau» kompaniiasynyń kómegi arqyly júzege asyrylmaq. Zamanaýi jylyjai keshenderi jylytý júiesi men salqyndatýdy, jaryq rejimin, tamshylatyp sýarýdy, atmosferadaǵy kómirqyshqyl gazynyń mólsherin basqaratyn zamanaýi avtomattandyrylǵan klimattyq baqylaý júiesimen jabdyqtalady dep josparlanǵan.
