Jiynda Túrkistan oblysy prokýratrýasynyń kámeletke tolmaǵandardyń quqyǵy men zańdy múddelerin saqtaý, balalar arasyndaǵy jáne olarǵa qarsy quqyqbuzýshylyqtardyń aldyn alý jumystaryna jasalǵan taldaýdyń qorytyndysy boiynsha berilgen usynystar qaraldy.
Jiynǵa tóraǵalyq etken oblys ákiminiń orynbasary Beisen Tájibaev balalar quqyǵyn qorǵaý baǵytyndaǵy jumystardy sapaly atqarý kerektigin aitty.
– Oblysymyzda mektepterde qaýipsizdikti saqtaý boiynsha 894 bilim oshaǵyna 7 myńnan astam beinekamera men týrniket, qorshaý, dabyl batyrmasy ornatylýda. Ol maqsatta 5,9 mlrd teńge qaralyp, jyl sońyna deiin «Qaýipsiz mektep» jobasy tolyq iske asady.
Degenmen bul mektep aýmaǵynda ǵana. Budan tys, árbir maman ózine tiesili jumysty atqarýy tiis. Qur eseppen jiyndy jaba salýǵa bolmaidy. Bul – bir kún qaralyp, rettele salatyn nárse emes.
Jyl boiy ainalysatyn sharýa. Sondyqtan árkez nazarda ustańyzdar. Bala kimmen turady, qandai otbasyda ómir súredi, áleýmettik jaǵdaiy qalai? Bárin anyqtap, zerdeleý jasap, málimetter bazasyn tolyqtyryp shyǵyńyzdar.
Sondai-aq Túrkistan oblysynda «ARTSPORT» baǵdarlamasy júrgizilip jatqanyn bilesizder. 30 myń balany tegin úiirmemen qamtýǵa qarjy bólinip otyr. Ol úiirmelerge aldymen áleýmettik jaǵynan az qamtylǵan otbasylardyń balalaryn tartyńyzdar. Balalardy osyndai tegin uiymdarǵa tirkeý jaǵyn qarastyryńyzdar, – degen Beisen Tájibaev qoǵamdaǵy jasóspirimderge qatysty keleńsiz jaǵdailardyń aldyn alý jóninde de usynystar men tapsyrmalar berdi.
Jiynda Túrkistan qalasy men Jetisai, Tólebi aýdanyndaǵy komissiia tóraǵalary kámeletke tolmaǵandar arasyndaǵy qylmys pen quqyqbuzýshylyq, olarǵa zorlyq-zombylyq jáne ózine ózi qol jumsaýdyń aldyn alý jónindegi atqarylǵan jumystar týraly baiandady.
Sonymen qatar jetim jáne ata-anasynyń qamqorlyǵynsyz qalǵan balalarǵa arnalǵan bilim berý uiymynyń túlekterin turǵyn úimen qamtamasyz etý boiynsha baiandama jasaldy. Keshki jáne syrtqy bilim berý uiymdarynda bilim alýshylardy, ómirde qiyn jaǵdaida júrgen kámeletke tolmaǵandardy áleýmettik ońaltý jónindegi jumystardyń júzege asyrylýy da nazardan tys qalmady.
Oblys ákiminiń orynbasary bul baǵyttaǵy máselelerdiń aldyn alý boiynsha tiisti túsindirme jumystaryn júrgizýdi tapsyrdy. Bala ómirine, bilimine, quqyǵyna jaýapty árbir mekeme óz isine muqiiat bolýy kerektigin aityp, balalar quqyǵy boiynsha jalǵan málimet beretin jaýapty basshylarǵa qatań shara kóriletindigin eskertti.
