Túrkistan oblysynda tún ishinde 18 jastaǵy jigitti ákesiniń kózinshe atyp ketti, dep habarlaidy Dalanews.kz Qaz365.kz-ke silteme jasap.
Oqiǵa keshki saǵat 23:00 shamasynda bolǵan. Jábirlenýshiniń ákesiniń aitýynsha, balasyn aýyldasy "aradaǵy máseleni sóilesip shesheiik" dep kezdesýge shaqyrǵan. Ákesi ulymen birge barǵan kezde olardy bir top adam qorshap, qysym kórsete bastaǵan.
"10-15 bala jinalyp tur eken. Bir aýyz sózge kelmesten, meni qorshap aldy. Sodan soń, mashinadan bir zat aldy. Dýbinka bolar dep qarap turǵanymda, onysy pistolet bolyp shyqty da, maǵan qarai oq atty. Sol kezde men eńkeiip qaldym. Ekinshi ret ataiyn dep jatqanda, oq aldyma qalqan bolyp tura qalǵan balamnyń ishine tidi. Búzaqylar qashyp bara jatqan jerinen Ózbekstan shekarasynda ustaldy. Sol jerden olardy tańǵy saǵat 05:30-da arnaiy jasaq qyzmetkerleri ustap ákeldi. Áke sheshesi balanyń hal-jaǵdaiyn suraýǵa da kelmedi", – deidi oqiǵanyń kýágeri, jábirlenýshiniń ákesi Bahramjan Shýkýrov.
Oblystyq densaýlyq saqtaý basqarmasy jaralanǵan jigittiń jaǵdaiy týraly málimet berdi.
"10 aqpan kúni Sairam aýdandyq ortalyq aýrýhanasyna travmatikalyq qarýdan atylǵan azamat jetkizildi. Alǵashqy tekserý barysynda oqtyń dene qýysyna ótpegeni anyqtaldy. Naýqasqa qajetti diagnostikalyq zertteýler júrgizilip, tiisti meditsinalyq kómek kórsetildi. Dárigerlerdiń baqylaýynan keiin jalpy jaǵdaiy qanaǵattanarlyq dep baǵalanyp, ambýlatoriialyq baqylaýǵa jiberilip, úiine qaitaryldy", – delingen habarlamady.
Jábirlenýshi tarap janjaldyń týyndaýyna bozbalanyń atastyrylǵan qalyńdyǵyna qatysty daý sebep bolýy múmkin ekenin aitady. Qazirgi ýaqytta jas jigit jeke klinikada em qabyldap jatyr.
