Túrkistan: I toptaǵy múgedekterdiń kútim jasaýshylaryna jańa járdemaqy túri engizildi
Jalpy óńirde búgingi tańda 647 063 áleýmettik tólem alýshy bar. Onyń ishinde, I toptaǵy múgedekke kútim jasaityn adam sany – 2 263, múgedek balalar sany – 14 517. Al, asyraýshysynan airylý jaǵdaiy boiynsha járdemaqy alýshylar sany – 18 360 adam.
– Otbasynda eki jáne odan da kóp birinshi toptaǵy múgedek turatyn jaǵdaida, kútimdi júzege asyratyn adamǵa járdemaqy olardyń árqaisysyna tólenedi. Al birinshi toptaǵy múgedekke kútimdi birneshe adam júzege asyrǵan jaǵdaida, járdemaqy azamattardyń bireýine ǵana taǵaiyndalady. Sondai-aq, birinshi toptaǵy múgedek jáne kútimdi júzege asyratyn adam bir eldi mekende turýy qajet. Kútim jasaýshy qyzmetin rásimdeý úshin «Azamattarǵa arnalǵan úkimet úiine» ótinish berip, tólemi sol kúnnen bastap taǵaiyndalady, – dedi Hadisha Tillábaiqyzy.
Sonymen qatar, búginde elimizde zeinetaqy júiesine birqatar ózgerister engizilgen. Sonyń biri – áielderdiń zeinet jasyn ulǵaitý. Departament basshysy orynbasarynyń mindetin atqarýshy Janat Jamahovanyń aitýynsha, bul ózgeristi júzege asyrý úshin 2018-2027 jyldar aralyǵynda 10 jyl ishinde áielderdiń zeinetkerlik jasy kezeń-kezeńimen 63 jasqa deiin jetkizilmek.
Biyl qazaqstandyq áielder 60 jasta zeinetke shyǵatyn bolsa, 2022 jyldyń 1-qańtarynan bastap bul kórsetkish 60 jas 6 aiǵa teń bolady. Departament mamandary 1961 jyldyń ekinshi jartyjyldyǵynda dúniege kelgen áielderge aǵymdaǵy jyldyń sońyna deiin zeinetaqy taǵaiyndaý úshin ótinish berip úlgerý kerektigin eske salady. Tiisti qujattar rásimdelmegen jaǵdaida zeinetke shyǵý quqyǵy taǵy alty aiǵa keiinge shegerilip, 60 jas 6 aidan asqanda ǵana múmkindik týady.
