Túrkistan oblysynyń elektr jelilerinde aǵymdaǵy jyldyń 2 qarashasynan bastap elektr energıasy men qýatynyń tapshylyǵy tirkeldi. Oblystyń tutynatyn qajetti kólemine jetpeı energıa tapshylyǵy oryn alǵan. Sebebi, «KEGOC» AQ óndirýshi qýattardyń tapshylyǵynan jáne 500 kVt-tyq «Soltústik-Ońtústik» tranzıtiniń artyq júktelýine jol bermeý úshin májbúrli túrde shektegen. Endi elektr energıasynyń tapshylyǵyn joıý maqsatynda kelisimder júrýde. Bul týraly Túrkistan oblysynyń energetıka jáne turǵyn úı-kommýnaldyq sharýashylyq basqarma basshysynyń orynbasary Ashat Berdihanov málimdedi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

QR Energetıka mınıstrliginiń aqparaty boıynsha aǵymdaǵy jyldyń qarasha-jeltoqsan aılarynda eldiń biryńǵaı energetıkalyq júıesinde elektr energıasynyń tapshylyǵy oryn alady. Eń joǵary júkteme saǵattarynda tutyný ótken jylǵydan 1 500 MVt-tan asatyn bolady. Osyǵan baılanysty Jambyl, Qyzylorda, Soltústik Qazaqstan, Shyǵys Qazaqstan, Aqmola oblystarynda jáne Shymkent qalasynda shekteýler engizilýde.

– Atalǵan másele QR Energetıka mınıstrliginde sheshilýde. Jambyl GRES-niń generasıasyn 800 MVt-qa deıin arttyrý maqsatynda qosymsha energıa bloktaryn iske qosý jumystary júrýde. Sondaı-aq, «Energopotok» JSHS JGRES-pen elektr energıasynyń qosymsha kólemin jetkizý boıynsha kelisimderge qol qoıyldy. Sonymen qatar, Almaty oblysynda keshki maksımýmda Moınaq GES qýatyn arttyrý boıynsha jumystar júrgizilýde, – dedi Ashat Ermekuly.