Túrki tarihynyń jazylýy talqylandy
Onlain formatta uiymdastyrylǵan jiynǵa Halyqaralyq Túrki akademiiasy prezidentiniń orynbasary, PhD Ashat Kesikbai, Túrkiianyń Fyrat ýniversitetiniń professory Ahmed Býran, Niide Ómer Halisdemir ýniversitetiniń prorektory, professor Iliias Gókhan men atalǵan joǵary oqý ornynyń professory Hikmet Qorash qatysty.
Basqosýdy Ahmed Býran ashyp, júrgizip otyrdy. Túrkiialyq ǵalym óz sózinde ortaq túrki tarihynyń jazylýynyń máni men mańyzyna keńirek toqtalyp ótti.
Óz kezeginde Halyqaralyq Túrki akademiiasy basshysynyń orynbasary Ashat Kesikbai ózi qyzmet atqaratyn uiymǵa túrki álemine ortaq túrki tarihyn oqýlyǵyn ázirleý mindeti júktelgenin jáne ony akademiia oryndap shyqqanyn tilge tiek etti.
Osy oraida aita keteiik, Túrki Keńesine múshe memleketter basshylarynyń tapsyrmasymen Halyqaralyq Túrki akademiiasy ázirlegen «Ortaq túrki tarihy» oqýlyǵy Ázerbaijan, Qazaqstan jáne Túrkiia mektepteriniń baǵdarlamasyna engizile bastady.
Biylǵy jyly «Ortaq túrki tarihy» pánin fakýltativ retinde Túrkiiada 30 myń oqýshy, Qazaqstanda 15 myń oqýshy, Ázerbaijanda 10 myń oqýshy tańdady. Oqýlyq ejelgi dáýirden bastap XV ǵasyrǵa deiingi kezeńdi qamtidy. Oqý quralynda túrki halyqtary qurǵan memleketterdiń tarihymen birge olardyń dástúrleri, mádenieti jáne ulttyq oiyndardyń paida bolý tarihy jan-jaqty kórsetilgen.
Basqosýda sóz alǵan ózge de ǵalymdar túrki dúniesiniń mádenieti de, mádeni murasy da ortaq ekendigine toqtaldy. Izdenýshilerdiń paiymdaýynsha, ony ortaq zerttep-zerdeleý barsha túrki jurty úshin úlken olja, sarqylmas qazyna bolary anyq.
