UEFA talaptaryna bailanysty 2024 jyldan bastap elimizdegi barlyq stadionnyń astynda jylý bolýy kerek. El stadiondaryna degen talaptyń kúsheiýine orai UEFA-nyń halyqaralyq talaptaryna sai «Turkestan-Arena» stadionynda jylytý jáne sý burý júieleri ornatyldy. Sondai-aq6 alań tolyq aýystyrylyp, tabiǵi kógal tóseldi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jańarǵan stadionda Qazaqstan fýtbol federatsiiasy inspektsiialaý jumystary jaqyn kúnderi júrgizedi. Oblys ortalyǵyndaǵy qurylys alańdaryn aralaǵan Túrkistan oblysynyń ákimi Darhan Satybaldy stadiondaǵy jańartý jumystarymen tanysty. Jaýapty basshylarǵa birqatar tapsyrmalar berdi.
Stadion alańyna Ispaniiada óndirilgen jasandy kógal tóseldi. Jasandy tósem UEFA-nyń barlyq zamanaýi talaptaryna sai keledi. 12 000 kórermenge arnalǵan fýtbol alańdary úshin halyqaralyq jáne ulttyq qurama komandalary oiyndaryn oinatýǵa ruqsat berilgenin eskersek, «Turkestan-Arena» stadionyna qosymsha 5000 kórermenge arnalǵan oryndyqtar qosý josparlanýda.
Aita keteiik, «Turkestan-Arena» ortalyq stadionynda 2022 jyly sporttyń birneshe túrinen oblystyq, qalalyq is-sharalar, jergilikti fýtbol klýbtary el birinshiliginde fýtbol oiyndaryn ótkizgen.
Stadion fýtbol alańynan bólek sport kesheniniń qyzmetin atqarady. Keshen boks, gimnastika, ioga, aýyr atletika, trenajer, fitnes zaldarymen jabdyqtalǵan. Munda barlyq sport úiirmelerde balalarǵa tegin sabaqtar uiymdastyrylǵan. Qonaqtarǵa yńǵaily bolý úshin batys bóliginde úlken ashana, al shyǵys bóliginde fýdkordpen qamtamasyz etilgen.
Óńirde týristerge ońtaily jaǵdai jasaý baǵytynda júieli jumys atqarylyp keledi. Túrkistan qalasynda jeke investitsiia esebinen «Qolóner ortalyǵy» jobasy qolǵa alyndy. Budan bólek Qoja Ahmet Iasaýi kesenesi mańyndaǵy «Kúltóbe» eski qalashyǵy abattandyrylady. Oblys ortalyǵynda aýmaǵy 11,8 gektar jerge akvapark, villa aimaqtary qamtylǵan bes juldyzdy qonaqúi salý jóninde kelissóz júrgizildi. Sondai-aq sheteldikter qyzyǵýshylyǵyn eskerip, ulttyq oiyndarymyzdy jáne týrizmdi damytý maqsatynda 99,3 gektar aýmaqqa ippodrom nysany salynady.
