Astanada úsh kóliktiń qatysýymen bolǵan jol-kólik oqiǵasynan keiin oqiǵa ornynan ketip qalǵan júrgizýshi ustaldy, dep habarlaidy Dalanews.kz.
Aldyn ala málimet boiynsha, bul oqiǵaǵa kúdikti 2016 jylǵy Olimpiada chempiony jáne álem chempiony Daniiar Eleýsinov deidi shuǵyl habarlamada.
Jelide taraǵan aqparatqa sáikes, jol apaty Nura aýdanyndaǵy Tóle bi kóshesi men Halifa ben Zaid ál-Nahaian kóshesiniń qiylysynda, «Han Shatyr» saýda oiyn-saýyq ortalyǵy mańynda bolǵan.
Málimetke sáikes, Toyota Land Cruiser avtokóliginiń júrgizýshisi jol apatynan keiin oqiǵa ornynan ketip qalǵan. Izdestirý sharalary barysynda atalǵan kólik Dostyq kóshesinde, «Han Shatyr» mańynda toqtatylǵan.
BAQ aqparaty boiynsha, mas kúiinde kólik tizgindegen Daniiar Eleýsinov bolýy múmkin. Qazir oqiǵa ornynda politsiia qyzmetkerleri jumys istep jatyr, tekserý júrgizilýde.
Eskertý: Bul quqyq qorǵaý organdarynyń aldyn ala aqparaty. Resmi tekserý aiaqtalǵannan keiin qosymsha málimet jariialanady.
