Pákistan jaǵalaýyna jaqyn Arab teńizinde K2 Airways áýe kompaniiasyna tiesili Boeing 737 júk ushaǵy radardan joǵalyp ketkennen keiin izdeý-qutqarý operatsiiasy bastaldy, dep habarlaidy dalanews.kz.
Pákistannyń aviatsiia biliginiń málimetinshe, ushaq Birikken Arab Ámirlikteriniń Shardja qalasynan Karachige baǵyt alǵan. Bailanys úziler aldynda ekipaj dispetcherlerge navigatsiialyq júiede aqaý paida bolǵanyn habarlaǵan. Arada birneshe minýt ótken soń Boeing biiktigin kúrt joǵalta bastaǵan.
Qolda bar aqparatqa sáikes, ushaq baǵytyn ózgertkennen keiin onymen bailanys Ormara qalasy mańynda úzilgen. Bul aimaq Karachiden batysqa qarai shamamen 287 shaqyrym jerde ornalasqan.
Qazir ushaq joǵalýy múmkin degen aýmaqta aýqymdy izdeý jumystary júrip jatyr. Operatsiiaǵa qutqarý qyzmetteri men áskeri kemeler tartylǵan. Ázirge ushaqtyń apatqa ushyraǵany resmi túrde rastalǵan joq. Oqiǵanyń naqty sebepteri anyqtalyp jatyr.
Flightradar24 dereginshe, signal joǵalar aldynda ushaq minýtyna shamamen 6,8 shaqyrym jyldamdyqpen tómendegen. Bul Boeing áýelde jolaýshylar tasymaldaityn ushaq retinde paidalanylǵan. 1999 jyldan bastap ol "Aeroflot" áýe kompaniiasynda, keiin Garuda Indonesia quramynda ushqan. 2012 jyly júk ushaǵyna qaita jabdyqtalyp, 2024 jyly K2 Airways kompaniiasyna berilgen.
