Keshe keshke birqatar aqparat quraly eks-Ishki ister ministri Erlan Turǵymbaevtyń ustalǵanyn habarlaǵan. Búgin bul derekti Bas prokýratýra rastady. Osy tusta birqatar telegram-arnalar eks-ministrdiń ustalýyna bailanysty mańyzdy málimetterdi bólisip úlgerdi, dep habarlaidy Dalanews.kz.
Turǵymbaev ne úshin kináli dep tanyldy?
Ishki ister ministrliginiń burynǵy basshysynyń ústinen qylmystyq is qozǵaý týraly aryz-talap eki jyldan beri aitylyp keldi.
"Chemodan gossekretov" telegram arnasynyń málimetinshe, tergeý barysynda Turǵymbaevtyń "shapyrashty klanynyń" múddesi úshin áreket etkeni týraly bultartpas dálelder paida bolǵan.
"Ol prezident Toqaevty qorqytý maqsatynda Qańtar oqiǵasynyń masshtabyn asyryp kórsetken, tártipsizdikke bailanysty shyndyqqa janaspaityn málimetter bergen. Sonymen qatar Almatydaǵy jeke quram qyzmetkerlerine jumys ornyn tastap ketýdi buiyrǵan. Tergeý kezinde Qańtar oqiǵasyna qatysty basqa da mańyzdy málimetter anyqtaldy. Turǵymbaev eski Qazaqstannyń beldi ókili Ahmetjan Esimovpen tyǵyz bailanysta bolǵan jáne sonyń adamy dep esepteledi", - dedi arna derekkózi.
Ishki ister ministrligin basqarǵan Erlan Turǵymbaevtyń ustalǵanyn eń aldymen qazaqtildi media habarlady.
"Bizdiń derekkózderdiń málim etkenindei, búgin eks-Ishki ister ministri Erlan Turǵymbaev ustaldy. Mundai sheshimdi arnaiy prokýrorlar Turǵymbaevqa qatysty "2022 jylǵy qańtardaǵy qaiǵyly oqiǵaǵa bailanysty qyzmet ókilettigin asyra paidalaný" baby boiynsha qozǵalǵan qylmystyq is aiasynda qabyldady", - dep jazdy Nege aqparattyq portaly.
Eske salaiyq, 20 naýryzda Bas prokýratýra Qańtar oqiǵasy boiynsha Turǵymbaevtan jaýap alǵanyn jariia etken.
Turǵymbaev Ishki ister ministrligin 2019 jyldyń aqpan aiynan bastap basqardy. Qańtar oqiǵasynan keiin kóp uzamai – 2022 jyldyń 25 aqpanynda qyzmetinen bosatyldy.
Odan keiin 2022 jyldyń 17 tamyzyna deiin 6 aiǵa jýyq prezidenttiń keńesshisi boldy, keiin saiasat sahnadan joǵalyp ketti.
"Erlan Turǵymbaevtyń bir mezette keńesshi laýazymynan bosatylýy oǵan vedomstvoaralyq tergeý toby tarapynan suraqtar bolǵanyn aiǵaqtaidy", - dep jazǵan edi sol tusta Dala inside telegram arnasy.
Erlan Turǵymbaev qańtardaǵy tártipsizdikter kezinde Almatyǵa 20 myńǵa jýyq lańkes kelgenin habarlaǵan edi. Odan bólek, birqatar telegram arnalarda "Turǵymbaev atyshýly "Dikii Armannyń" Qańtarda Qazaqstanǵa erkin kirýin qamtamasyz etken" degen aqparat taraǵan.
"Qylmystyq iste memlekettik qupiia málimetter bolýyna bailanysty sotaldy tergep-tekserýdiń basqa derekteri jariialanbaidy", - deidi óz kezeginde Bas prokýratýra.
