«Turan» tapsyrmany oryndady
Jýyrda túrkistandyq fýtbolshylar Oralda jergilikti «Aqjaiyq» komandasymen sheberlik baiqasty. Tartysty kezdesýdiń 30-minýtynda «Aqjaiyq» oiynshysy Gashenkov esep ashsa, 72-minýtta Deobald esepti teńestirdi. Osylaisha, oiyn 1:1 esebimen teń aiaqtaldy. Oraldaǵy jaqsy nátijeden keiin «Turan» fýtbolshylary upai sany 25-ke jetkizip, týrnir kestesinde 12-orynǵa turaqtady. Sóitip, premer-ligadaǵy ornyn saqtap qaldy. Biyl sátsiz maýsym ótkizgen «Qaisar» men «Jetisý» komandalary birinshi ligaǵa túsetin boldy.
Chempionat bastalar sátte oblys basshylyǵy «Turan» fýtbolshylaryna biyl premer-ligadaǵy ornyn saqtap, týrnir kestesinde joǵaryraq turýdy tapsyrǵan bolatyn. Oiynshylar birinshi tapsyrmany oryndady. Kelesi jyly «Turan» klýby budan da biik maqsattarǵa umtylmaq.
Sonymen birge birinshi ligada óner kórsetip júrgen Túrkistan oblysynyń «Maqtaaral» komandasy da jankúier senimin aqtaýda. Maqtaaraldyqtar birinshi ligada 43 upaimen ekinshi orynda kele jatyr. Sońǵy eki týrdy sátti ótkizse, premer-ligaǵa shyǵýy múmkin. Al «Qyran» komandasy úzdik úshtikte tur.
Áielder arasyndaǵy chempionatta da Túrkistan óńiriniń shoqtyǵy biik. «Tomiris-Turan» komandasy biyl el chempionatynda kúmis medalǵa ie boldy. Munyń bári óńirde fýtbol federatsiiasynyń jemisti jumys atqaryp jatqanyn bildiredi.
Túrkistan oblysynyń ákimi Ómirzaq Shókeev óńirde fýtboldyń damýyna airyqsha qoldaý kórsetip keledi. Qazirgi tańda Túrkistanda «Turan» fýtbol klýbynyń akademiiasy salynyp jatyr. Jańa keshende úlken jáne shaǵyn 10 fýtbol alańy bolady. Munda fýtboldy damytýǵa barlyq jaǵdai jasalady.
