Bul týraly OQO Aımaqtyq komýnıkasıalar qyzmetinde memleket basshysy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» joldaýynyń Túlkibas aýdanynda atqarylýy boıynsha ótken baspasóz konferensıasynda aýdan basshysy Nurbol Turashbekov habarlady. Málimetke sáıkes, Túlkibastyń áleýmettik-ekonomıkalyq damýyn arttyrý maqsatynda aýdanda 1 iri, 7 orta, 23 kishi jáne 8 qosalqy barlyǵy 39 kásiporyn jyl basynan beri 8 629,5 mln. teńgeniń  ónimin óndirgen.

–  Aýdanda kásipkerlik salasynda jumys isteıtinder sany 17 344 adamǵa jetip, bıznesmender sany 106 adamǵa nemese 100,6% ósip otyr. Jalpy kásipkerlik salasynda belsendi jumys istep turǵan shaǵyn jáne orta kásipkerlik sýbektileriniń sany 6520 birlikti qurap otyr. Aýdandaǵy 4 shaǵyn nesıe uıymy  arqyly 2712 jeke azamatqa  1237,2 mln teńge nesıe berildi, – dedi Nurbol Ábdisattaruly.

Aýdanda kásipkerliktiń keń qanat jaıýy úshin, ıaǵnı, bıznes-ortany túbegeıli jaqsartý jáne keńeıtý aıasynda «Nátıjeli jumyspen qamtý jáne jappaı kásipkerlikti damytý» baǵdarlamasynyń barlyq baǵyty boıynsha tıisti jumystar atqarylyp, nátıjesinde, belsendi túrde 235 azamat oqýǵa joldansa, 34  azamatqa 81,2 mln. teńge  shaǵyn nesıe berilgen. Sondaı-aq, baǵdarlamanyń úshinshi baǵyty aıasynda 961 adam jumyspen qamtylypty.

Joldaýda aıtylǵan árbir basymdyqqa jeke-jeke toqtalǵan aýdan basshysy kásipkerlikti damytýda memleket-jekemenshik seriktestigin damytý jumystarynyń barysyn da baıandady. Máselen, jyl sońyna deıin osy baǵytta Túlkibastaǵy Aqbıik aýylynda 100 oryndyq  bir balabaqsha el ıgiligine berilmek. Jáne bul jumystar odan ári jalǵasatyn bolady. Osy kórsetkishterdiń nátıjesinde mektepke deıingi balalardy balabaqshamen qamtý isi aýdanda bıyl 92,6 paıyzdy qurap otyr eken.

 

OQO ákiminiń baspasóz qyzmeti