OQO ákiminiń baspasóz qyzmeti uiymdastyrǵan press-týr barysynda jýrnalister osyndai igi istiń kýási boldy. BAQ ókilderi aýdandaǵy aýyl sharýashylyǵy salasynda atqarylyp jatqan sharýalarmen tanysyp, birqatar kásiporyndardy aralap kórdi.
Aimaqtyń tynys-tirshiligimen tanystyrǵan aýdan ákimi Nurbol Turashbekov biylǵy jyldy sharýalar jemisti aiaqtap otyrǵanyn atap ótti.
– Aýdan kólemindegi 571,8 shaqyrymdy quraityn 111 kanal kommýnaldyq menshikten Respýblikalyq menshiktiń teńgerimine qabyldandy. Aýdanymyzda biylǵy jyly jańadan 31 óndiristik kooperativi ashylyp, 385 adam jumyspen qamtyldy. Sonymen qatar 261 birlik mal bordaqylaý alańy, 82 birlik shaǵyn sút fermasy ashyldy, – dedi Nurbol Turashbekov.
Sonymen birge aýdan basshysy aýyl sharýashylyǵy salasyn damytý maqsatynda «Aýyl sharýashylyǵyn qarjylai qoldaý qory» arqyly ár túrli baǵdarlama sheńberinde jyl basynan beri 237 mln. teńge bolatyn 71 joba, al, aýyl azamattaryn yntalandyrý úshin «Yrys» qarjy uiymy arqyly 218 mln. teńge kóleminde 55 joba qarjylandyrylǵanyn aitty.
Osyndai memlekettik baǵdarlama aiasynda qarjylai qoldaý tapqan jobalardyń biri «Qazaqbai» óndiristik kooperativi. Mal bordaqylaý isimen ainalysatyn kooperativtiń búginde úsh múshesi bar. Olar kooperativke birigýdiń arqasynda jumystaryn júielep, memlketten jeńildetilgen 3 mln. teńge kóleminde nesie alǵan. Aldaǵy ýaqytta jumysyn keńeitip, qosymsha sýbsidiia ielenýdi josparlap otyr.
