Alaida Qabatovpen jaqsy bailanystamyn degen ortalyqtyń direktoryn Tursynbektiń ózi tanymaityn bolyp shyqty. Al Nurbek Qanai esimdi jigit qylmys jasaǵanyn tolyq moiyndap, bul áreketke ne úshin barǵanyn, 8 birdei jalǵan kýálikti qalai jasaǵanyn túsindirip berdi, dep habarlaidy 31 arnanyń “Informbiýro” baǵdarlamasy.
Baýyrjan Jádigerov Tursynbek Qabatovpen jaqsy aralasamyn dese, Qabatov búgin bul jigitti birinshi ret kórip turmyn deidi. Ekeýi qyzylkeńirdek bolyp biraz daýlasqan. Biraq tanymal shoýmen Baýyrjan Jádigerovti de, qyzymdy daiyndaǵan Nurbek Qanaidy da múldem tanymaimyn dep otyr.
“Osy 140+1 mektebinde qyzymnyń oqitynyn bilemin. Sol jerden ENT-ǵa ketkenin de bilemin. Qyzym ENT-ǵa kirdi. Qyzym ENT-ny tapsyrdy. Biraq ishindegi jańaǵy bolyp jatyrǵan bylyqty jasaǵan kim ekenin men bilmeimin! Jalǵan qujatty jasaǵan jańaǵy Nurbek pa kim ekenin bilmeimin men”, – deidi Qabatov.
Al matematik Nurbek Qanai Ádemi Amanǵali men taǵy úsh túlektiń ornyna basqa adamdy kirgizgenin moiyndady. Sondaǵy muǵalimniń bar maqsaty – joǵarǵy ball áperip, milliondaǵan oqyrmany bar Tursynbek Qabatovtyń Instagram jelisinde jarq etip kóriný eken.
“Ádemi joǵary ball alsa erteń men ózimniń avtoritetimdi kóterý úshin istedim. Prosto protses bylai ǵoi: Ádeminiń fotosyna Symbattyń fotosyn qoiamyn, prosto aýystyra salamyn. Qalǵan eshteńeni ózgertpeimin”, – deidi muǵalim Nurbek Qanai.
Osylaisha 13 maýsymdaǵy UBT-da Ádemi Amanǵalidiń ornyna Nurbek Qanaidyń týǵan qaryndasy Symbat Qanai, Saodat Alievanyń ornyna Dana esimdi qyz, Beksultan Qarshyǵanyń ornyna Nurlybai, Kúzenov Temirlannyń ornyna Nurislam test tapsyrý kerek bolǵan. Joǵary ball alyp berýge kelisken olardyń barlyǵy stýdent.
“Originaldarymen kirdi. Ádemi Ádemi bolyp, Symbat – Symbat bolyp kirdi. Tekserýshiler kóredi da: aa, jaqsy dep kirdi. Kirgennen keiin login, parol beredi ǵoi. Login, parol bergennen keiin aýysyp ketedi bir-birimen. Sóitip aýysyp ketkennen keiin otyryp, tapsyryp jatqan kezde Symbattyń ornyna Ádemi otyryp qoidy ǵoi. Eger tekserýshiler kelip jatsa tekserip jatatyn bolsa klaviatýranyń astynda ýdostoverenie bar. Jai ǵana sony shyǵaryp qoiyńdar da Ádemi Symbat bolyp otyra ber degen másele ǵoi”, – deidi muǵalim.
Biraq kóp uzamai 102-ge qońyraý túsip, segiz adam UBT-dan shyǵarylǵan. Nurbek Qanai ideiany 4 túlektiń ata-anasy bilmeidi deidi. Oǵan qazir qylmystyq is qozǵalǵan. Kinámdi moiyndaimyn degen Nurbek Qanai qandai jazaǵa tartylatyny ázirge belgisiz. Al shoýmen Tursynbek Qabatov bul jaitty advokat Abzal Quspan post jariialaǵanda ǵana bildim dep otyr.
https://www.youtube.com/watch?v=jTn7V3F_Hkg&list=PLn2OyECVOtB-fAtqFaOtexulp-6nOrg9i&index=7
