تانىمال ازىلكەش تۇرسىنبەك قاباتوۆ ءوزىنىڭ دە، قىزىنىڭ دا ۇبت-داعى بىلىققا تۇك قاتىسى جوق ەكەنىن ايتتى. ءارتىس قىزى دايىندالعان ءبىلىم ورداسىنا ارنايى بارىپ، ەمتيحاننان شەتتەتىلگەن وزگە دە ءۇش تۇلەكتىڭ اتا-اناسىن ىزدەدى.

الايدا قاباتوۆپەن جاقسى بايلانىستامىن دەگەن ورتالىقتىڭ ديرەكتورىن تۇرسىنبەكتىڭ ءوزى تانىمايتىن بولىپ شىقتى. ال نۇربەك قاناي ەسىمدى جىگىت قىلمىس جاساعانىن تولىق مويىنداپ، بۇل ارەكەتكە نە ءۇشىن بارعانىن، 8 بىردەي جالعان كۋالىكتى قالاي جاساعانىن ءتۇسىندىرىپ بەردى، دەپ حابارلايدى 31 ارنانىڭ “ينفورمبيۋرو” باعدارلاماسى.

باۋىرجان جادىگەروۆ تۇرسىنبەك قاباتوۆپەن جاقسى ارالاسامىن دەسە، قاباتوۆ بۇگىن بۇل جىگىتتى ءبىرىنشى رەت كورىپ تۇرمىن دەيدى. ەكەۋى قىزىلكەڭىردەك بولىپ ءبىراز داۋلاسقان. ءبىراق تانىمال شوۋمەن باۋىرجان جادىگەروۆتى دە، قىزىمدى دايىنداعان نۇربەك قانايدى دا مۇلدەم تانىمايمىن دەپ وتىر.

“وسى 140+1 مەكتەبىندە قىزىمنىڭ وقيتىنىن بىلەمىن. سول جەردەن ەنت-عا كەتكەنىن دە بىلەمىن. قىزىم ەنت-عا كىردى. قىزىم ەنت-نى تاپسىردى. ءبىراق ىشىندەگى جاڭاعى بولىپ جاتىرعان بىلىقتى جاساعان كىم ەكەنىن مەن بىلمەيمىن! جالعان قۇجاتتى جاساعان جاڭاعى نۇربەك پا كىم ەكەنىن بىلمەيمىن مەن”، – دەيدى قاباتوۆ.



ال ماتەماتيك نۇربەك قاناي ادەمى امانعالي مەن تاعى ءۇش تۇلەكتىڭ ورنىنا باسقا ادامدى كىرگىزگەنىن مويىندادى. سونداعى ءمۇعالىمنىڭ بار ماقساتى – جوعارعى بالل اپەرىپ، ميلليونداعان وقىرمانى بار تۇرسىنبەك قاباتوۆتىڭ Instagram جەلىسىندە جارق ەتىپ كورىنۋ ەكەن.

“ادەمى جوعارى بالل السا ەرتەڭ مەن ءوزىمنىڭ اۆتوريتەتىمدى كوتەرۋ ءۇشىن ىستەدىم. پروستو پروسەس بىلاي عوي: ادەمىنىڭ فوتوسىنا سىمباتتىڭ فوتوسىن قويامىن، پروستو اۋىستىرا سالامىن. قالعان ەشتەڭەنى وزگەرتپەيمىن”، – دەيدى ءمۇعالىم نۇربەك قاناي.

وسىلايشا 13 ماۋسىمداعى ۇبت-دا ادەمى ءامانعاليدىڭ ورنىنا نۇربەك قانايدىڭ تۋعان قارىنداسى سىمبات قاناي، ساودات الييەۆانىڭ ورنىنا دانا ەسىمدى قىز، بەكسۇلتان قارشىعانىڭ ورنىنا نۇرلىباي، كۇزەنوۆ تەمىرلاننىڭ ورنىنا نۇريسلام تەست تاپسىرۋ كەرەك بولعان. جوعارى بالل الىپ بەرۋگە كەلىسكەن ولاردىڭ بارلىعى ستۋدەنت.

“وريگينالدارىمەن كىردى. ادەمى ادەمى بولىپ، سىمبات – سىمبات بولىپ كىردى. تەكسەرۋشىلەر كورەدى دا: اا، جاقسى دەپ كىردى. كىرگەننەن كەيىن لوگين، پارول بەرەدى عوي. لوگين، پارول بەرگەننەن كەيىن اۋىسىپ كەتەدى بىر-بىرىمەن. ءسويتىپ اۋىسىپ كەتكەننەن كەيىن وتىرىپ، تاپسىرىپ جاتقان كەزدە سىمباتتىڭ ورنىنا ادەمى وتىرىپ قويدى عوي. ەگەر تەكسەرۋشىلەر كەلىپ جاتسا تەكسەرىپ جاتاتىن بولسا كلاۆياتۋرانىڭ استىندا ۋدوستوۆەرەنيە بار. جاي عانا سونى شىعارىپ قويىڭدار دا ادەمى سىمبات بولىپ وتىرا بەر دەگەن ماسەلە عوي”، – دەيدى ءمۇعالىم.

ءبىراق كوپ ۇزاماي 102-گە قوڭىراۋ ءتۇسىپ، سەگىز ادام ۇبت-دان شىعارىلعان. نۇربەك قاناي يدەيانى 4 تۇلەكتىڭ اتا-اناسى بىلمەيدى دەيدى. وعان ءقازىر قىلمىستىق ءىس قوزعالعان. كىنامدى مويىندايمىن دەگەن نۇربەك قاناي قانداي جازاعا تارتىلاتىنى ازىرگە بەلگىسىز. ال شوۋمەن تۇرسىنبەك قاباتوۆ بۇل جايتتى ادۆوكات ابزال قۇسپان پوست جاريالاعاندا عانا ءبىلدىم دەپ وتىر.

https://www.youtube.com/watch؟v=jTn7V3F_Hkg&list=PLn2OyECVOtB-fAtqFaOtexulp-6nOrg9i&index=7