«Otandastar» qory uıytqy bolǵan sharanyń mindeti - alys-jaqyn shetelderde, Avstrıa, Anglıa, Fransıa, Shvesıa, Iran, Qytaı, Monǵolıa, Tájikstan, Reseı, Belorýs, Ózbekstan jáne Qyrǵyzstanda turatyn qandastarǵa arnap, Qazaqstannyń kıeli jerlerine tarıhı-tanymdyq ekskýrsıalar serıasyn uıymdastyrý.
Eki kúnge jalǵasatyn ekskýrsıanyń, eń aldymen, Túrkistanda ótý maqsaty - otandastarǵa Qoja Ahmet Iassaýı, Arystan Bab keseneleri, Túrkistannyń tarıhı murajaıy jáne óńirdiń basqa da kórikti jerlerin tanystyrý arqyly qazaq halqynyń mádenı jáne rýhanı qundylyqtaryn nasıhattaý.
Barsha túrki jurtynyń Atajurtyna kelgen qandastardyń qadamyna qut tilep, zor qurmetpen qarsy alǵan oblys ákimi Janseıit Túımebaev osynaý mańyzdy kezdesýdiń Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń aıasynda uıymdastyrylyp jatqanyn aıtyp,
qatysýshylardy Túrkistandy túrki áleminiń rýhanı ortalyǵyna aınaldyrý jóninde naqty mindeti búgingi tańda qalaı júzege asyrylyp jatqanynan habardar etti.
«Rýhanı jańǵyrý» baǵdarlamasy aıasynda 2018 jyly oblysta 46 joba men 168 is-shara belgilenip, ótkizilýde. «TÝǴAN JER» arnaıy jobasynyń «ATAMEKEN» KİSHİ BAǴDARLAMASY sheńberinde Túrkistan oblysynda 2018 jyly 28 mlrd. 156 mln.teńgeniń jobalary, ıaǵnı, 428 nysan (oblys bólingenge deıin barlyǵy 445 nysan) júzege asýda, onyń ishinde quny 887,2 mln. teńge quraıtyn 23 nysan iske qosyldy. Baǵdarlamada qoıylyp otyrǵan basty máselelerdiń biri – adamdy bilimdi, ári rýhanı baı etip tárbıeleý", – dedi óńir basshysy.
