Tóreǵali «Aiqynnan» nege bas tartty?
Bul Tóreǵali Tóreáliniń birinshi ret ótkizip otyrǵan keshi emes. Árbir aialdamada, árbir kóshe boiynda ilingen jarnama halyqty eleń etkizbei qoimady. Osymen arman qala Almatynyń ózinde ekinshi ret ótip otyr. Biraq ánshi jigittiń keshi bolar aldynda onyń piar-menejderi Fariza esimdi boijetkenge qońyraý shaldyq. Maqsat – ánshimen kesh aldynda az-kem tildesý. Habarlasqanymyzdy qaiteiik, sózimizdiń sońyna deiin tyńdamastan, tutqany qoia saldy. Tilshilermen nege tildeskisi kelmedi? Bul ánshiniń kózqarasy ma, álde menedjeriniń qalaýy ma?
Uqqanymyz – ánshi gazetke suhbat berýden qashatyn sekildi. Ne sebepti? Sońǵy kezderi mundai úrdis ánshilerdiń arasynda kóbeiip ketti. Sonda olardyń qazaq basylymdaryn mensinbegeni me? Tipti keibiri gazet oqymaityndyqtaryn, qazaq baspasózinen múldem habarsyz ekendikterin jasyrmaidy. Bul ne? «Juldyzdyq» pa, álde menmendik pe?
Tóreǵalidyń juldyz «aýrýyna» shaldyqqany alǵash emes. «Allo» ánine bailanysty da qońyraý shalyp, habarlasa almaǵanbyz. Onda da telefon tutqasyn kótergen «kómekshileri» gazet tilshisimen tildese almaityndyǵyn jetkizgen edi.
Halyqtyń kózi, qulaǵy, hám tiline ainalǵan qazaq baspasózi Tóreǵaliǵa kerek bolmasa, Tóreǵalidyń da qazaq jýrnalisterine qajeti bar ma? Telearnalardan jii «jyltyńdasa» ózderin jaryq juldyz sanaityndar kóbeiip tur. Keide ánshilerdiń osylai «aýrýǵa» shaldyǵýyna ózimiz kináli sekildimiz. Jarqyratamyz dep sary mysty altynǵa ainaldyryp alamyz da, onyń altyn emes, mys ekenin kópke dáleldei almai qalatynymyz taǵy bar.
Tóreǵali da, ózge ánshiler de ózderin nasihattaýǵa qazaq baspasózi, onyń ishinde qazaq jýrnalisteri múddeli ekenin umytpasa eken deimiz. Áitpese, orys tilindegi aqparat kózderi de, orystildi BAQ-ta qazaq nasihattaýǵa májbúr emes.
Jadyra PERDEBAIQYZY
Derekkózi: «Aiqyn» gazeti
