Jýyrda premer-ministrdiń orynbasary bolyp taǵaiyndalǵan Qanat Bozymbaev endi óńirlik saiasat, turǵyn úi-kommýnaldyq sharýashylyq, tótenshe jaǵdailar jáne sý resýrstary máselelerine jetekshilik etedi. Al óńirlerde sý tasqynynyń áli de beti qaitar emes.
Tótenshe jaǵdailarǵa jaýapty vitse-premer Qanat Bozymbaev pen tótenshe jaǵdailar ministri Shyńǵys Árinov sý tasqyny bolyp jatqan Qostanai oblysy Arqalyq qalasynyń turǵyndarymen kezdesti, - dep habarlaidy Dalanews.kz.
Óńir ákimdigi málimetine súiensek, sý tasqynyna qarsy sharalardy úilestirý jáne qarǵyn sý júrý kezeńiniń saldaryn joiý jónindegi oblystyq jedel shtab Arqalyq qalasynda ornalasqan. Vitse-premer halyqpen kezdesýi kezinde keibir suraqtardy jaqtyrtpai qaldy.
"Prezidentimiz senim artqan soń, osyndai jaǵdaiǵa baryp, sizdi qoidy dep oilaimyn. Bizde elimizge ziian keltirip jatqan oqymysty kóp. Ultqa qyzmet etetin minezdi adamdar jetispeidi. Qarnym ashqannan emes, qadirim qashqannan jylaǵym keledi. Sizde osy bilikte júrgenińizge 30 jyl boldy ǵoi. Eldi qaida apardyńyzdar? Sýǵa aǵyp ketken eldi qarańyzdarshy? Bizdiń halyq qaiyrshy kúige tústi. Úilerine barsań jylaǵyn keledi", - dedi Arqalyq qalasy turǵyndarynyń biri.
Qanat Bozymbaev turǵynǵa jaýap berip, áńgimege saiasatty aralastyrýdyń qajeti joǵyn aitqan.
"Baýyrym, maǵan naqty ne aitqyń keledi?! Saiasat týraly aitpai-aq qoiyńyz. Meniń qolymnan keletin naqty suraq aityńyz", - dedi ol.
Suraq qoiǵan turǵyn sýdan zardap shekken 37 úidi qaita salyp berýdi suraǵan.
"Toqtashy, men saǵan aittym ǵoi. Komissiia keledi, eger 40 nemese 37 úi turýǵa bolmaidy dese, onda salyp beremiz. Taǵy bes ret aitaiyn ba?" - dedi vitse-premer.
Qanat Bozymbaev Qostanai oblysyna jumys sapary kezinde tótenshe jaǵdai jariialanǵan Amangeldi, Jangeldi aýdandary men Arqalyq qalasyndaǵy jaǵdaimen tanysqan. Jangeldi aýdanynda Kólqamys aýylyndaǵy sý tasqyny bolǵan jerge baryp, sondai-aq, qarǵyn sýdan zardap shekken Kókalat aýylynyń turǵyndarymen de kezdesti.
Qostanai oblysynyń ońtústigindegi 75 jeke turǵyn úidi sý basqan. 13 sý shaiǵan jáne 7 búlingen jol (1 kópir, 6 jol jamylǵysy) bar. 12 eldi mekende kólik qatynasy joq. 1,2 myń adam evakýatsiialandy, olardyń 408-i - balalar.
"Sý tasqyny bastalǵannan beri 686,2 myń tekshe metrden asa qarǵyn sý sorylyp, 16 myńnan asa qap tóselip, 1,3 myń tonna inertti material tógildi. Qutqarý jumystaryna 1,7 myń adam, 517 tehnika, 30 sýda júzý quraly jáne 2 ushaq jumyldyryldy", - dedi jaýaptylar óńirdegi jaǵdai týraly.
