"توقتاتشى، ساعان ايتتىم عوي". بوزىمبايەۆ ارقالىق تۇرعىنىنىڭ سۇراعىن جاقتىرتپاي قالدى

ساعىنىش سارداروۆا 04 ءساۋ. 2024 12:07 1666

جۋىردا پرەمەر-مينيستردىڭ ورىنباسارى بولىپ تاعايىندالعان قانات بوزىمبايەۆ ەندى وڭىرلىك ساياسات، تۇرعىن ۇي-كوممۋنالدىق شارۋاشىلىق، توتەنشە جاعدايلار جانە سۋ رەسۋرستارى ماسەلەلەرىنە جەتەكشىلىك ەتەدى. ال وڭىرلەردە سۋ تاسقىنىنىڭ ءالى دە بەتى قايتار ەمەس.

توتەنشە جاعدايلارعا جاۋاپتى ۆيسە-پرەمەر قانات بوزىمبايەۆ پەن توتەنشە جاعدايلار ءمينيسترى شىڭعىس ءارىنوۆ سۋ تاسقىنى بولىپ جاتقان قوستاناي وبلىسى ارقالىق قالاسىنىڭ تۇرعىندارىمەن كەزدەستى، - دەپ حابارلايدى Dalanews.kz.

ءوڭىر اكىمدىگى مالىمەتىنە سۇيەنسەك، سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى وبلىستىق جەدەل شتاب ارقالىق قالاسىندا ورنالاسقان. ۆيسە-پرەمەر حالىقپەن كەزدەسۋى كەزىندە كەيبىر سۇراقتاردى جاقتىرتپاي قالدى.

"پرەزيدەنتىمىز سەنىم ارتقان سوڭ، وسىنداي جاعدايعا بارىپ، ءسىزدى قويدى دەپ ويلايمىن. بىزدە ەلىمىزگە زيان كەلتىرىپ جاتقان وقىمىستى كوپ. ۇلتقا قىزمەت ەتەتىن مىنەزدى ادامدار جەتىسپەيدى. قارنىم اشقاننان ەمەس، ءقادىرىم قاشقاننان جىلاعىم كەلەدى. سىزدە وسى بيلىكتە جۇرگەنىڭىزگە 30 جىل بولدى عوي. ەلدى قايدا اپاردىڭىزدار؟ سۋعا اعىپ كەتكەن ەلدى قاراڭىزدارشى؟ ءبىزدىڭ حالىق قايىرشى كۇيگە ءتۇستى. ۇيلەرىنە بارساڭ جىلاعىن كەلەدى"، - دەدى ارقالىق قالاسى تۇرعىندارىنىڭ ءبىرى.

قانات بوزىمبايەۆ تۇرعىنعا جاۋاپ بەرىپ، اڭگىمەگە ساياساتتى ارالاستىرۋدىڭ قاجەتى جوعىن ايتقان.

"باۋىرىم، ماعان ناقتى نە ايتقىڭ كەلەدى؟! ساياسات تۋرالى ايتپاي-اق قويىڭىز. مەنىڭ قولىمنان كەلەتىن ناقتى سۇراق ايتىڭىز"، - دەدى ول.

سۇراق قويعان تۇرعىن سۋدان زارداپ شەككەن 37 ءۇيدى قايتا سالىپ بەرۋدى سۇراعان.

"توقتاشى، مەن ساعان ايتتىم عوي. كوميسسيا كەلەدى، ەگەر 40 نەمەسە 37 ءۇي تۇرۋعا بولمايدى دەسە، وندا سالىپ بەرەمىز. تاعى بەس رەت ايتايىن با؟" - دەدى ۆيسە-پرەمەر.

قانات بوزىمبايەۆ قوستاناي وبلىسىنا جۇمىس ساپارى كەزىندە توتەنشە جاعداي جاريالانعان امانگەلدى، جانگەلدى اۋداندارى مەن ارقالىق قالاسىنداعى جاعدايمەن تانىسقان. جانگەلدى اۋدانىندا كولقامىس اۋىلىنداعى سۋ تاسقىنى بولعان جەرگە بارىپ، سونداي-اق، قارعىن سۋدان زارداپ شەككەن كوكالات اۋىلىنىڭ تۇرعىندارىمەن دە كەزدەستى.

قوستاناي وبلىسىنىڭ وڭتۇستىگىندەگى 75 جەكە تۇرعىن ءۇيدى سۋ باسقان. 13 سۋ شايعان جانە 7 بۇلىنگەن جول (1 كوپىر،  6 جول جامىلعىسى) بار. 12 ەلدى مەكەندە كولىك قاتىناسى جوق. 1،2 مىڭ ادام ەۆاكۋاسيالاندى، ولاردىڭ 408ء-ى - بالالار.

"سۋ تاسقىنى باستالعاننان بەرى 686،2 مىڭ تەكشە مەتردەن اسا قارعىن سۋ سورىلىپ، 16 مىڭنان اسا قاپ توسەلىپ، 1،3 مىڭ توننا ينەرتتى ماتەريال توگىلدى. قۇتقارۋ جۇمىستارىنا 1،7 مىڭ ادام، 517 تەحنيكا، 30 سۋدا ءجۇزۋ قۇرالى جانە 2 ۇشاق جۇمىلدىرىلدى"، - دەدى جاۋاپتىلار وڭىردەگى جاعداي تۋرالى.


ۇسىنىلعان
سوڭعى جاڭالىقتار
تەلە2 - باستىق1
22 ءساۋ. 2024 18:05
x