Toqtar Serikov: «Sahnanyń qadiri qashty»
Toqtar men Beibit kópten beri halyq aldyna shyǵyp óner kórsetpei júr. Munyń sebebi de bar eken. Beibit úsh ulyna qarailasa, Toqtar gitarasyn jeke kásipke aiyrbastaǵan. Alaida ánshilerdiń halyqqa kórinbeýiniń taǵy bir sebebi bar. Ol – syrǵa taǵyp, shashyn boiap, jyrtyq kiim kigen áriptesteri men olardy qorǵaǵan aǵa býynǵa degen renishi.
– Kieli sahnamyzda shashyn boiap, qulaqtaryna syrǵa salyp, aýlary salaqtaǵan ánshiler qaptap ketti. Solardan jiirkengennen ketkim keledi, ketip baramyn. Qulaqtaryna syrǵa salatyn baýyrlarym, astagfirýllah olar meniń baýyrlarym emes. Baýyrlarym bolmai-aq qoisyn. Budan ózge tizesi jyrtyq kiim kietin qaryndastarym bar. Solardy kórgen kezde sahnadan ketkim keledi. Qazaq sahnasy olardy mensinbeýi kerek. Solardy jaqtaǵan aǵa-apalaryma ókpelimin, – degen bolatyn Toqtar Serikov «Aita bersin» baǵdarlamasyna bergen suhbatynda.
Osydan keiin qos ǵashyq ónerden ketedi dep jurt shýlasty. Tyńdarmandary olardyń ketpeýin surap ótindi. Arasynda muny durys sheshim dep baǵalaǵandar da boldy. Alaida ánshiniń ózi sol kezde ashynyp aityp qoiǵanyn tilge tiek etip jatyr. Ol «Búgin jeksenbi» baǵdarlamasy arqyly halyqqa ónerden eshqashan ketpeitinin aitty.
– Sol sózderdi aitqanym da, sol sátte qatty ashynyp ketkenim de ras. Biraq jurt týra maǵynasynda qabyldaǵan eken. Ketem degen joqpyn, bar bolǵany ketkim keledi dedim. Onyń ózindik sebebi de bar. Shashtaryn túrli-tústi etip boiap, qulaqtaryna syrǵa taǵyp, qazaq ónerine ziian keltirip júrgen kelimsek jastar júr. Solardan qatty jiirkenip ókpe-nazymdy bildirgen edim. Sahnanyń qadiri ábden qashty. Bizge bola áńgime órbitip, «Toqtar men Beibit ónerden ketpeńizdershi» dep iltipattaryn bildirip jatqan tyńdarmandarymyzǵa kóp rahmet. Mende ketý degen oi joq. Qazaqta “Bitke ókpelep, tonyńdy otqa jaqpa, – degen jaqsy sóz bar.
«Eger áriptesterime bola sahnadan ketsem, qazaq ónerinde qadir qasietim qalmaityn shyǵar. Qazaqta el barda, jurt barda, Beibit ekeýimiz ónerdi tastamaimyz. Qazaqpen birge qartaiamyz. Sebebi, ákemiz – óner, sheshemiz – sahna», – deidi Toqtar Serikov.
Ánshiniń bul sózderin jubaiy da qoshtai tústi. Túrli kásippen jáne bala tárbiesimen ainalyssa da, ónerden eshýaqytta ketpeitinderin aityp ótti.
