توقتار مەن بەيبىت كوپتەن بەرى حالىق الدىنا شىعىپ ونەر كورسەتپەي ءجۇر. مۇنىڭ سەبەبى دە بار ەكەن. بەيبىت ءۇش ۇلىنا قارايلاسا، توقتار گيتاراسىن جەكە كاسىپكە ايىرباستاعان. الايدا انشىلەردىڭ حالىققا كورىنبەۋىنىڭ تاعى ءبىر سەبەبى بار. ول – سىرعا تاعىپ، شاشىن بوياپ، جىرتىق كيىم كيگەن ارىپتەستەرى مەن ولاردى قورعاعان اعا بۋىنعا دەگەن رەنىشى.
– كيەلى ساحنامىزدا شاشىن بوياپ، قۇلاقتارىنا سىرعا سالىپ، اۋلارى سالاقتاعان انشىلەر قاپتاپ كەتتى. سولاردان جيىركەنگەننەن كەتكىم كەلەدى، كەتىپ بارامىن. قۇلاقتارىنا سىرعا سالاتىن باۋىرلارىم، استاگفيرۋللاح ولار مەنىڭ باۋىرلارىم ەمەس. باۋىرلارىم بولماي-اق قويسىن. بۇدان وزگە تىزەسى جىرتىق كيىم كيەتىن قارىنداستارىم بار. سولاردى كورگەن كەزدە ساحنادان كەتكىم كەلەدى. قازاق ساحناسى ولاردى مەنسىنبەۋى كەرەك. سولاردى جاقتاعان اعا-اپالارىما وكپەلىمىن، – دەگەن بولاتىن توقتار سەرىكوۆ «ايتا بەرسىن» باعدارلاماسىنا بەرگەن سۇحباتىندا.
وسىدان كەيىن قوس عاشىق ونەردەن كەتەدى دەپ جۇرت شۋلاستى. تىڭدارماندارى ولاردىڭ كەتپەۋىن سۇراپ ءوتىندى. اراسىندا مۇنى دۇرىس شەشىم دەپ باعالاعاندار دا بولدى. الايدا ءانشىنىڭ ءوزى سول كەزدە اشىنىپ ايتىپ قويعانىن تىلگە تيەك ەتىپ جاتىر. ول «بۇگىن جەكسەنبى» باعدارلاماسى ارقىلى حالىققا ونەردەن ەشقاشان كەتپەيتىنىن ايتتى.
– سول سوزدەردى ايتقانىم دا، سول ساتتە قاتتى اشىنىپ كەتكەنىم دە راس. ءبىراق جۇرت تۋرا ماعىناسىندا قابىلداعان ەكەن. كەتەم دەگەن جوقپىن، بار بولعانى كەتكىم كەلەدى دەدىم. ونىڭ وزىندىك سەبەبى دە بار. شاشتارىن ءتۇرلى-تۇستى ەتىپ بوياپ، قۇلاقتارىنا سىرعا تاعىپ، قازاق ونەرىنە زيان كەلتىرىپ جۇرگەن كەلىمسەك جاستار ءجۇر. سولاردان قاتتى جيىركەنىپ وكپە-نازىمدى بىلدىرگەن ەدىم. ساحنانىڭ ءقادىرى ابدەن قاشتى. بىزگە بولا اڭگىمە ءوربىتىپ، «توقتار مەن بەيبىت ونەردەن كەتپەڭىزدەرشى» دەپ ءىلتيپاتتارىن ءبىلدىرىپ جاتقان تىڭدارماندارىمىزعا كوپ راحمەت. مەندە كەتۋ دەگەن وي جوق. قازاقتا “بيتكە وكپەلەپ، تونىڭدى وتقا جاقپا، – دەگەن جاقسى ءسوز بار.
«ەگەر ارىپتەستەرىمە بولا ساحنادان كەتسەم، قازاق ونەرىندە ءقادىر قاسيەتىم قالمايتىن شىعار. قازاقتا ەل باردا، جۇرت باردا، بەيبىت ەكەۋىمىز ونەردى تاستامايمىز. قازاقپەن بىرگە قارتايامىز. سەبەبى، اكەمىز – ونەر، شەشەمىز – ساحنا»، – دەيدى توقتار سەرىكوۆ.
ءانشىنىڭ بۇل سوزدەرىن جۇبايى دا قوشتاي ءتۇستى. ءتۇرلى كاسىپپەن جانە بالا تاربيەسىمەن اينالىسسا دا، ونەردەن ەشۋاقىتتا كەتپەيتىندەرىن ايتىپ ءوتتى.
