Almatyda jol qozǵalysynyń qaýipsizdigin arttyrý maqsatynda reidtik is-sharalar ótti. Memleket basshysy Qasym-Jomart Toqaevtyń synynan keiin qalada samokattarǵa baqylaý kúsheidi, dep habarlaidy Dalanews.kz.
Polisia.kz dereginshe, bir táýlikte Almatyda samokat júrgizýshileriniń 800-den astam quqyq buzýshylyǵy anyqtaldy. Onyń ishinde:
- 489 – qozǵalysqa qatysýshylarǵa qoiylatyn talaptardy oryndamaý (ÁQBtK 620-bap),
- 237 – jaiaý júrginshiler men ózge de qatysýshylardyń qozǵalys erejelerin buzýy (615-bap),
- 11 – ata-analardyń balalardyń qaýipsizdigin qamtamasyz etý sharalaryn oryndamaýy (127-bap),
- 47 – abattandyrý erejelerin buzý (505-bap),
- 23 – qoǵamdyq oryndardy lastaý (434-2-bap).
Politsiianyń málimdeýinshe, adamdar samokattardy trotýar men joldyń ústine qaldyryp, qozǵalysqa kedergi keltirýde. Arnaiy turaqqa 259 samokat jetkizildi. Sondai-aq olardyń kóp shoǵyrlanatyn jerinde tártipti qadaǵalaý úshin operator-kompaniialar bergen samokattarmen júrgen 50 politsiia marshrýty qosymsha shyǵaryldy.
Almaty qalasy PD jergilikti politsiia qyzmeti basqarmasynyń bastyǵy Serik Shumaevtyń aitýynsha, samokat paidalanýshylarymen júieli jumys júrgizilýde.
"Biz quqyq buzýshylyqtardyń aldyn alamyz, erejelerdi túsindiremiz jáne qajet bolǵan jaǵdaida zańda qarastyrylǵan sharalardy qoldanamyz", — dedi ol.
Aita keteiik, memleket basshysy Qasym-Jomart Toqaev 8 qyrkúiekte halyqqa Joldaýynda samokattardyń qoǵam úshin qaýipti ekenin aitty. Onyń sózinshe, eki jyl buryn zańǵa ózgerister engizilip, jaiaý júrginshi joldarymen júrýge shekteýler qoiylǵan. Alaida jaǵdai ózgermegen.
Prezident Joldaýynan keiin áleýmettik jeliler men messendjerlerde Astananyń ortalyq kósheleriniń birinde politseilerdiń samokattardy jinap júrgen sáti túsirilgen video tarady.
