الماتىدا جول قوزعالىسىنىڭ قاۋىپسىزدىگىن ارتتىرۋ ماقساتىندا رەيدتىك ءىس-شارالار ءوتتى. مەملەكەت باسشىسى قاسىم-جومارت توقايەۆتىڭ سىنىنان كەيىن قالادا ساموكاتتارعا باقىلاۋ كۇشەيدى، دەپ حابارلايدى Dalanews.kz.
Polisia.kz دەرەگىنشە، ءبىر تاۋلىكتە الماتىدا ساموكات جۇرگىزۋشىلەرىنىڭ 800-دەن استام قۇقىق بۇزۋشىلىعى انىقتالدى. ونىڭ ىشىندە:
- 489 – قوزعالىسقا قاتىسۋشىلارعا قويىلاتىن تالاپتاردى ورىنداماۋ (اقبتك 620-باپ)،
- 237 – جاياۋ جۇرگىنشىلەر مەن وزگە دە قاتىسۋشىلاردىڭ قوزعالىس ەرەجەلەرىن بۇزۋى (615-باپ)،
- 11 – اتا-انالاردىڭ بالالاردىڭ قاۋىپسىزدىگىن قامتاماسىز ەتۋ شارالارىن ورىنداماۋى (127-باپ)،
- 47 – اباتتاندىرۋ ەرەجەلەرىن بۇزۋ (505-باپ)،
- 23 – قوعامدىق ورىنداردى لاستاۋ (434-2-باپ).
پوليسيانىڭ مالىمدەۋىنشە، ادامدار ساموكاتتاردى تروتۋار مەن جولدىڭ ۇستىنە قالدىرىپ، قوزعالىسقا كەدەرگى كەلتىرۋدە. ارنايى تۇراققا 259 ساموكات جەتكىزىلدى. سونداي-اق ولاردىڭ كوپ شوعىرلاناتىن جەرىندە ءتارتىپتى قاداعالاۋ ءۇشىن وپەراتور-كومپانيالار بەرگەن ساموكاتتارمەن جۇرگەن 50 پوليسيا مارشرۋتى قوسىمشا شىعارىلدى.
الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى سەرىك شۇمايەۆتىڭ ايتۋىنشا، ساموكات پايدالانۋشىلارىمەن جۇيەلى جۇمىس جۇرگىزىلۋدە.
"ءبىز قۇقىق بۇزۋشىلىقتاردىڭ الدىن الامىز، ەرەجەلەردى تۇسىندىرەمىز جانە قاجەت بولعان جاعدايدا زاڭدا قاراستىرىلعان شارالاردى قولدانامىز"، — دەدى ول.
ايتا كەتەيىك، مەملەكەت باسشىسى قاسىم-جومارت توقايەۆ 8 قىركۇيەكتە حالىققا جولداۋىندا ساموكاتتاردىڭ قوعام ءۇشىن ءقاۋىپتى ەكەنىن ايتتى. ونىڭ سوزىنشە، ەكى جىل بۇرىن زاڭعا وزگەرىستەر ەنگىزىلىپ، جاياۋ جۇرگىنشى جولدارىمەن جۇرۋگە شەكتەۋلەر قويىلعان. الايدا جاعداي وزگەرمەگەن.
پرەزيدەنت جولداۋىنان كەيىن الەۋمەتتىك جەلىلەر مەن مەسسەندجەرلەردە استانانىڭ ورتالىق كوشەلەرىنىڭ بىرىندە پوليسەيلەردىڭ ساموكاتتاردى جيناپ جۇرگەن ءساتى تۇسىرىلگەن ۆيدەو تارادى.
