Qazaqstan prezidenti Qasym-Jomart Toqaev Jeńis kúnine orai Reseige barady. Bul týraly Qazaqstannyń Reseidegi elshisi Dáýren Abaev málimdegen edi. Osy tusta Dalanews.kz agenttigi 8-9 mamyrǵa josparlanǵan sapardyń elimiz úshin qandai kemshiligi men artyqshylyǵy bolatynyn sarapshy Aibar Oljaidan surap kórdi. Ol istiń mán-jaiyna bailanysty pikir bildirdi.
Dáýren Abaev TASS agenttigine bergen suhbatynda memleket basshylarynyń osyǵan uqsas kezdesýleri jii ótip turatynyn atap ótti.
“Bizdiń prezidentterimizdiń kezdesýleri jii ótip turady. Vladimir Pýtinniń qazandaǵy Qazaqstanǵa saparynan keiin prezidentterimiz eki ret – Sankt-Peterbýrgtegi EAEO jáne TMD sammitterinde jáne aqpanda Qazanda ótken Bolashaq oiyndarynda kezdesti. Bizdiń prezident 8-9 mamyrda Máskeýge sapar shegýdi josparlap otyr”, - dedi Abaev.
Sonymen qatar ol Astana men Kiev arasyndaǵy qorǵanys salasyndaǵy bailanystar týraly aitty.
“Biz olarǵa qaýeset, jalǵan, tekserilmegen aqparat retinde qaraýymyz kerek”, - dedi Abaev.
Ol Qazaqstan men Resei arasyndaǵy qarym-qatynastyń odaqtas ekenin atap ótti.
Al sarapshy Aibar Oljai elimiz bul qadam arqyly saiasi upai jinaitynyn alǵa tartady.
“Meniń oiymsha, buny tolyq saiasi reverans deýge bolady. Bizdiń syrtqy diplomatiiamyz reveransty tiimdi qoldanady jáne ol jemisin berýde. 8-9 mamyr Resei úshin ataýly kún bolsa, ol jaqqa baryp, kóńil-iltipat bildirýde turǵan eshteńe joq. Bul jaǵdaida bizge Reseige qatysty qandai da bir syrtqy saiasi sheshimderde manevr jasaý óte yńǵaily bolady.
Sondyqtan bul durys saiasat dep oilaimyn. Árine, Qytaida nemese Amerikada mańyzdy kún bolyp jatsa, ol jaqta da tóbe kórsetken jón. Ár elmen dostyq qarym-qatynas izdei berý kerek. Sonyń esebinen Qazaqstan árkimmen sózge kelmei, syrtqy saiasatta, syrtqy logistikada qiyndyqqa kezigip jatqan joq”, - deidi sarapshy.
