QR Prezidentiniń keńesshisi – Baspasóz hatshysy Rýslan Jeldibai Telegram paraqshasynda Memleket basshysynyń Niý-Iork qalasyndaǵy sapary týraly málimet berdi. Onyń aitýynsha, Qasym-Jomart Toqaevtyń keshegi jumys kestesi joǵary deńgeidegi mazmundy kezdesýlerge toly boldy, dep habarlaidy Dalanews.kz
Jalpy, sapar barysynda Prezident memleket jáne úkimet basshylarymen, halyqaralyq uiymdar men iri kompaniia jetekshilerimen 20-dan astam kezdesý ótkizdi. Áńgimelesýler aýyl sharýashylyǵy, bilim berý, sport, investitsiia jáne jasandy intellekt siiaqty baǵyttardy qamtydy.
Sonyń nátijesinde Qazaqstan ekonomikasyna 5,2 mlrd dollar kóleminde investitsiia tartý jóninde kelisimderge qol jetkizildi. Atap aitqanda, Qazaqstan men AQSh-tyń iri kompaniialary arasynda 11 kelisim men memorandým bekitildi.
Memleket basshysy PepsiCo, Amazon, Meta, Chevron, ExxonMobil, Blackstone, Citigroup, Embraer siiaqty alpaýyt korporatsiialardyń jetekshilerimen jeke kelissózder ótkizdi. Máselen, PepsiCo Almaty oblysynda 368 mln dollarlyq zaýyt salýdy bastasa, Amazon Qazaqstannyń birneshe qalasynda jerústi infraqurylymyn damytyp, shalǵai aimaqtardy joǵary jyldamdyqty internetpen qamtamasyz etýdi josparlap otyr.
Sonymen qatar Qasym-Jomart Toqaev AQSh Prezidenti Donald Tramppen de kelissóz júrgizdi. Kezdesýde ekijaqty yntymaqtastyq pen saýda-ekonomikalyq yqpaldastyq máseleleri qaraldy. Tramp Truth Social jelisindegi paraqshasynda qol qoiylǵan kelisimderdiń mańyzdylyǵyna toqtalyp, sonyń ishinde jalpy quny 4 mlrd dollar bolatyn 300 lokomotiv óndirisi týraly atap ótti.
Budan bólek, Toqaev BUU Bas hatshysy Antoniý Gýterrishpen, Ýkraina Prezidenti Vladimir Zelenskiimen, Chernogoriia Prezidenti Iakov Milatovichpen, sondai-aq AQSh úkimetiniń ókilderimen kelissózder ótkizdi. Kún sońynda Memleket basshysy FIFA Prezidenti Djanni Infantinony qabyldap, qazaqstandyq fýtboldy damytýǵa baǵyttalǵan jobalardy talqylady.
