Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaiynda «Halyqtyq qurylys» baǵdarlamasynyń mańyzyna toqtalyp, aldaǵy úsh jylda Ulttyq qordan osy jobaǵa 6,5 trln teńge bólinetinin málimdedi, dep habarlaidy dalanews.kz.
Prezidenttiń aitýynsha, 2027 jyl «Jalpyhalyqtyq aýqymdy qurylys jyly» bolady. Osy kezeńde Qazaqstanda áleýmettik nysandar, óndiris oryndary men kólik infraqurylymy keńinen damytylady.
Atap aitqanda, elimizdiń ár óńirinde balabaqshalar, mektepter, kitaphanalar, aýrýhanalar, emhanalar, ońaltý ortalyqtary men sport nysandary salynady. Sonymen qatar joldar, vokzaldar, áýejailar jáne jańa óndiris oryndary boi kóteredi.
Memleket basshysy aýqymdy qurylys jumystary myńdaǵan jańa jumys ornyn ashýǵa jáne otandyq kásipkerlerge qosymsha múmkindik berýge jol ashatynyn atap ótti.
«Táýelsiz Qazaqstannyń tól tarihynda mundai aýqymdy joba buryn-sońdy bolǵan emes. «Halyqtyq qurylys» – mazmuny keń, mán-maǵynasy tereń naǵyz halyqtyq joba. Biz el igiligine qyzmet etetin nysandar salyp, tutas memleketimizdiń kelbetin jańartamyz, búkil ultymyzdyń sana-sezimine serpin beremiz», – dedi Qasym-Jomart Toqaev.
Prezidenttiń pikirinshe, keleshek urpaqqa qarjy aktivterin ǵana emes, halyqtyń igiligine qyzmet etetin naqty áleýmettik nysandardy qaldyrý mańyzdy.
«Qurylyspen ainalysý – jasampazdyqqa, jańashyldyqqa umtylý. Sondyqtan «Qurylys jáne taǵy da qurylys» degen bir aýyz sóz jańǵyrý jolyna túsken Qazaqstannyń myzǵymas qaǵidaty, jalpyulttyq urany bolýǵa tiis», – dedi Memleket basshysy.
Sondai-aq Prezident «Halyqtyq qurylys» jobasy el azamattaryn ortaq maqsat pen múdde tóńiregine biriktiretinin aitty.
Ulttyq qordan bólinetin 6,5 trln teńgeniń tiimdi ári ashyq jumsalýyn arnaiy komissiia baqylaidy. Toqaev komissiia múshelerine qoiylatyn basty talap – jumysty dańǵazasyz, joǵary kásibi deńgeide jáne nátijeli atqarý ekenin atap ótti.
