Aqyn, qoǵam qaıratkeri Aýyt Muqıbek Memleket basshysy Qasym-Jomart Toqaevtyń jazýshy Ázilhan Nurshaıyqovqa qalaı qurmet kórsetkenin áńgimelep berdi.

- Qaı jyly, qandaı jınalys ekenin umyttym, Tumanbaı aǵama erip barǵanym esimde, Almatydaǵy Jazýshylar odaǵyna Qasym-Jomart Kemeluly keldi. Aıtpaqshy, ákesi Kemel Toqaevtyń seksen jyldyǵyna arnalǵan sharaǵa kelse kerek.

Aldyńǵy qatarda otyrǵan aqsaqal jazýshylarǵa jaǵalaı qol berip, amandasa bastady.

Marqum Ázilhan Nurshaıyqov aǵamyz ornynan turyp, "Qasym-Jomart, kishkentaı kezińde men seni eńkeıip turyp betińnen súıýshi edim, qazir sen bıiktep kettiń, boıym jetpeı qaldy..." - dedi.

Sol-aq, eken, Qasym-Jomart Kemeluly "Ázaǵa, onda endi men eńkeıip, Sizge betimnen súıgizeıin!" - dep, Ázilhan Nurshaıyqov aǵamyzdyń aldyna kelip, eńkeıip betinen súıgizdi. Ózi de qushaqtap, Ázilhan aǵamyzdyń betinen súıdi.


Zal toly adam edi, bári tebirenip ketti, bilem, oryndarynan turyp, qol soqty... - deıdi Aýyt Muqıbek.