اقىن، قوعام قايراتكەرى اۋىت مۇقيبەك مەملەكەت باسشىسى قاسىم-جومارت توقايەۆتىڭ جازۋشى ءازىلحان نۇرشايىقوۆقا قالاي قۇرمەت كورسەتكەنىن اڭگىمەلەپ بەردى.

- قاي جىلى، قانداي جينالىس ەكەنىن ۇمىتتىم، تۇمانباي اعاما ەرىپ بارعانىم ەسىمدە، الماتىداعى جازۋشىلار وداعىنا قاسىم-جومارت كەمەل ۇلى كەلدى. ايتپاقشى، اكەسى كەمەل توقايەۆتىڭ سەكسەن جىلدىعىنا ارنالعان شاراعا كەلسە كەرەك.

الدىڭعى قاتاردا وتىرعان اقساقال جازۋشىلارعا جاعالاي قول بەرىپ، امانداسا باستادى.

مارقۇم ءازىلحان نۇرشايىقوۆ اعامىز ورنىنان تۇرىپ، "قاسىم-جومارت، كىشكەنتاي كەزىڭدە مەن سەنى ەڭكەيىپ تۇرىپ بەتىڭنەن ءسۇيۋشى ەدىم، ءقازىر سەن بيىكتەپ كەتتىڭ، بويىم جەتپەي قالدى..." - دەدى.

سول-اق، ەكەن، قاسىم-جومارت كەمەل ۇلى "ءازاعا، وندا ەندى مەن ەڭكەيىپ، سىزگە بەتىمنەن سۇيگىزەيىن!" - دەپ، ءازىلحان نۇرشايىقوۆ اعامىزدىڭ الدىنا كەلىپ، ەڭكەيىپ بەتىنەن سۇيگىزدى. ءوزى دە قۇشاقتاپ، ءازىلحان اعامىزدىڭ بەتىنەن ءسۇيدى.


زال تولى ادام ەدى، ءبارى تەبىرەنىپ كەتتى، بىلەم، ورىندارىنان تۇرىپ، قول سوقتى... - دەيدى اۋىت مۇقيبەك.