Toqaev Ulytaý oblysynyń jańa ákimin taǵaiyndady, - dep habarlaidy Dalanews.kz.
"Memleket basshysynyń Jarlyǵymen Dastan Adaiuly Ryspekov Ulytaý oblysynyń ákimi laýazymyna taǵaiyndaldy, - delingen Aqordanyń habarlamasynda.
Ryspekov Dastan 1984 jyly Qaraǵandy oblysynda dúniege kelgen.Ál-Farabi atyndaǵy Qazaq Ulttyq ýniversitetin jáne QazMZÝ Almaty zań akademiiasyn támamdaǵan. Eńbek jolyn 2006 jyly Almaty qalasyndaǵy Ekonomika jáne biýdjetti josparlaý departamenti túsimderdi boljaý bóliminiń bas mamany retinde bastaǵan.
2007-2016 jyldary Almaty qalasynda Ekonomika jáne biýdjettik josparlaý departamentinde, Almaty qalasy boiynsha Tekserý komissiiasynda, respýblikalyq biýdjettiń atqarylýyn baqylaý jónindegi esep komitetinde basshylyq laýazymdarda jumys istedi. 2016-2018 jyldary - «Astana EKSPO-2017» UK» býhgalterlik esep jáne eseptilik departamentiniń direktory – bas býhgalteri. 2018-2019 jyldary - Pavlodar oblysy Kásipkerlik, saýda jáne týrizm basqarmasynyń basshysy.
2019 jyldyń sáýir aiynan bastap «Astana EKSPO-2017» UK» AQ Ekonomika jáne biýdjetti josparlaý departamentiniń direktory qyzmetin atqardy. 2020 jyldan bastap qazirgi ýaqytqa deiin Mádeniet jáne sport ministrligi Týrizm indýstriiasy komitetiniń tóraǵasy bolyp jumys istedi.
Buǵan deiin prezident Ulytaý oblysyn 2022 jyldyń 11 maýsymynan bastap basqarǵan Berik Ábdiǵaliulyn qyzmetinen bosatqan edi.
Biyl naýryzda derekkózder Qaraǵandy oblysynyń ákimi Ermaǵanbet Bólekbaev pen Ulytaý oblysynyń ákimi Berik Ábdiǵaliulynyń taǵdyry qyzý talqylanyp jatqanyn jetkizgen bolatyn.
Derekkóz Ulytaý oblysynyń basshysy bolyp Berik Ábdiǵaliuly kelgeli oblysta jemqorlyqqa qatysty daý kóbeigenin aitady.
«Basynda Sátbaev ákimi ustaldy, keiinnen oblystyq mádeniet basqarmasynyń basshysy da ustaldy. Qazirgi zańnama boiynsha ol (Berik Ábdiǵaliuly) otstavkaǵa ketýi kerek. Ulytaý oblysynda da júieli túrde biýdjettiń igerilmeýimen bailanysty problemalar bolyp turady: aimaq jeke investorlardy bylai qoiǵanda biýdjet qarajytynyń ózimen damymai otyr».
Derekkóz málimetinshe, eki ákimge de jaǵdaidy túzeýge múmkindik berilgenimen olar ony paidalanbaǵan. Sondyqtan aldaǵy ýaqytta kadrlyq aýys-túiis bolýy múmkin.
