Qasym-Jomart Toqaev salyq reformasy jaiynda pikir bildirdi, dep habarlaidy Dalanews.kz.
"Jańa Salyq kodeksin ázirleýge tapsyrma bergen kezde men meilinshe túsinikti, turaqty ári ádil salyq saiasatyna kóshý jóninde mindet qoidym. Shyn máninde, biz salyq saiasatyn qatańdatpaimyz, kerisinshe retke keltiremiz. Qazirgi kodeks kóp ózgeriske ushyraǵan. Zańǵa táýeldi aktilerge jáne jekelegen jaǵdailarda basqasha ereje qoldanatyn erekshelikterge toly. Kodeks oqyp, túsinýge qiyn qujatqa ainalǵan. Sonyń saldarynan kásipkerler men memlekettik qyzmetkerler ony árqalai qabyldap, óz ýájderin alǵa tartady. Qaptaǵan jeńildikter men salyq rejimderi kásipkerlerdiń bir bóligine artyqshylyq berse, taǵy biri oǵan narazy. Ol da negizsiz emes", deidi prezident.
Prezidenttiń sózinshe, bastapqyda salyq jeńildigi ekonomikanyń belgili bir salalary men biznestiń naqty sanattaryn qoldaý maqsatynda engizilgen.
"Biraq kásipkerler jeńildikti bas paidasyna jaratyp, salyqtan jaltaryp, biznesterin bólshektei bastady. Mundai jaǵdaiǵa biz jol bere almaimyz. Qazaqstan jappai ofshor aimaǵyna ainalyp ketpeýi kerek. Munyń bári salyqty basqarý júiesin kúrdelendirip, salyq júktemesi ádiletsiz bólinetin jaǵdaiǵa ákep soqty. Qazir Parlamentte múldem jańa Salyq kodeksi qaralyp jatyr. Atalǵan qujat biznestiń de, memlekettiń de múddesin eskerip, kásipkerlerdi salyqty durys tóleýge yntalandyrýǵa tiis. Qosymsha salyq túsimderi damý biýdjetin ulǵaityp, jańa mektepter, aýrýhanalar jáne basqa da áleýmettik nysandar salýǵa múmkindik beredi.
Ashyq jáne turaqty salyq júiesi elimizdiń investitsiialyq áleýetin kúsheitedi. Osynyń bári azamattardyń ál-aýqatynyń jaqsarýyna, tutas ekonomikanyń ósimine, iaǵni, túptep kelgende, biznestiń damýyna óte tiimdi ári paidaly bolmaq. Árine, osyndai kúrdeli kezeńde bizge eń aldymen aýyzbirshilik kerek. Halqymyzda «Yrys yntymaqty elge barady» degen jaqsy sóz bar. Uiysa bilgen ulttyń upaiy túgel. Sondyqtan jurtty ortaq maqsatqa jumyldyrý óte mańyzdy", – dedi Memleket basshysy.
