Memleket basshysy Qasym-Jomart Toqaev Qazaqstan halqyn Ramazan aiynyń bastalýymen quttyqtady, - dep habaralaidy Dalanews.kz.
"Qurmetti otandastar! Barshańyzdy qasietti Ramazan aiynyń bastalýymen quttyqtaimyn! Bul – halqymyzdyń rýhani ómirinde airyqsha mańyzy bar kezeń. Oraza kezinde sabyrlylyq pen qanaǵatshyldyq, janashyrlyq pen qamqorlyq sekildi izgi qundylyqtar erekshe dáripteledi. Azamattarymyz muqtaj jandarǵa kómek berip, qaiyrymdylyq jasaýǵa umtylady. Munyń bári islam dininiń gýmanistik ideialarynan bastaý alady. Halqymyz úshin din men dástúr – birin-biri tolyqtyryp, ózara sabaqtasyp jatqan egiz uǵym. Asyl dinimiz de, ata dástúrimiz de jurtty jaqsylyq pen jasampazdyqqa úndeidi.
Biyl Ramazan aiy Alǵys aitý kúnimen tuspa-tus kelip otyr. Munyń zor simvoldyq máni bar. Mazmuny tereń, maǵynasy úndes qos mereke halqymyzdyń berekeli birligin odan ári nyǵaita túsýge shaqyrady. Orazadan orazaǵa aman-esen jete bereiik! Barshańyzǵa baq-bereke tileimin! Niet qabyl bolsyn!" - dedi Prezident.
Sondai-aq, Prezident Qasym-Jomart Toqaev el halqyn Alǵys aitý kúnimen quttyqtady.
"Qurmetti otandastar! Barshańyzdy Alǵys aitý kúnimen shyn júrekten quttyqtaimyn! Bul jarqyn mereke azamattarymyzdyń bir-birine degen rizashylyǵy men tilektestiginiń, shynaiy qurmetiniń simvoly sanalady. Halqymyz ǵasyrlar boiy berekeli birligi men týǵan jerge degen sheksiz súiispenshiliginiń arqasynda eń kúrdeli synaqtar men qaterlerdi eńsere bildi. Osy irgeli qundylyqtar jalpyulttyq biregeiligimizdiń ajyramas bóligine ainaldy.
Biyl Qazaqstan halqy Assambleiasynyń qurylǵanyna 30 jyl tolady. Bul qurylym qoǵamdaǵy ózara túsinistik pen kelisimdi nyǵaitýǵa ólsheýsiz úles qosyp keledi. Qazir bizdiń aldymyzda júieli ári aýqymdy reformalardy júzege asyrý mindeti tur.
Osy oraida, ár azamattyń el taǵdyryna jaýapty ekenin tolyq sezine bilýi mańyzdy. Biz judyryqtai jumyla bilsek qana, úilesimdi jáne ádiletti qoǵam qurý jolynda jetistikke jetemiz. Týǵan eldiń igiligi úshin adal ári tynymsyz eńbek etip júrgen barsha otandastaryma alǵys aitamyn. Sizderge zor densaýlyq, baq-bereke tileimin!" - dedi Memleket basshysy.
