Memleket basshysy Qasym-Jomart Toqaev Qazaqstan ulttyq quramasyn VI Dúniejúzilik kóshpendiler oiyndarynda tabysty óner kórsetýimen quttyqtady, dep habarlaidy dalanews.kz.
Prezident osynaý joǵary nátijege sportshylarymyz taisalmas tabandylyqtyń, janqiiarlyq eńbek pen muqalmas erik-jigerdiń arqasynda jetkenin atap ótti.
Memleket basshysy chempiondar men júldegerlerge, bapkerler quramyna jáne barsha mamandarǵa shynaiy rizashylyǵyn jetkizip, mundai eren jetistikter Qazaqstannyń ulttyq sport túrleri damyǵan el retinde halyqaralyq bedelin asqaqtata túsetinin aitty. Qasym-Jomart Toqaev sportshylarymyzdyń eń bedeldi saiystarda biik belesterdi baǵyndyra berýine tilektestik bildirdi.
Aita keteiik, Qazaqstan quramasy 31 tamyz ben 6 qyrkúiek aralyǵynda Qyrǵyzstanda ótken VI Dúniejúzilik kóshpendiler oiyndaryna qatysqan bolatyn. Oiyndar qorytyndysy boiynsha qazaqstandyq sportshylar 74 medal jeńip aldy. Onyń ishinde 32 altyn, 20 kúmis jáne 22 qola júlde bar. Jalpykomandalyq esepte 30 altyn medal ielengen Qyrǵyzstan ekinshi orynǵa, jeti altyn júldesi bar Resei úshinshi orynǵa turaqtady.
Qazaqstandyq sportshylar aýdaryspaq, jamby atý, qazaq kúresi, alysh, armrestling, arqan tartys, toǵyzqumalaq, mangala, dástúrli sadaq atý, at jarysy jáne basqa da ulttyq sport túrlerinen jeńimpaz jáne júldeger atandy.
VI Dúniejúzilik kóshpendiler oiyndaryna 113 elden 3 myńǵa jýyq sportshy qatysty.
