Memleket basshysy Qasym-Jomart Toqaev Boao Aziia forýmynyń HHIII sessiiasynda Qazaqstan men Qytaidyń taýar ainalymy boiynsha tarihi rekordtyq kórsetkishke jetkenin jariialady, dep habarlaidy Dalanews.kz.
Qazirgi kezde Qazaqstan Qytaidyń Ortalyq Aziiadaǵy negizgi saýda-ekonomikalyq seriktesine ainaldy.
"Qytaidyń aimaqtaǵy saýda-sattyǵy men salǵan investitsiiasynyń teń jartysy Qazaqstannyń úlesine tiesili. Byltyr Qazaqstan men Qytai arasyndaǵy taýar ainalymy 41 milliard AQSh dollaryn qurady. Bul – tarihi rekordtyq kórsetkish", - dedi Toqaev.
Byltyr eki el arasyndaǵy júk tasymaly 22 paiyzǵa artyp, shamamen 30 million tonnaǵa jetti. Osy oraida prezident QHR Tóraǵasy Si Tszinpinniń "Bir beldeý, bir jol" aýqymdy megajobasyn on jyldan astam ýaqyt buryn Qazaqstanǵa jasaǵan sapary kezinde tanystyrǵanyn da eske aldy. Atalǵan joba Shyǵys pen Batys arasyndaǵy negizgi kópir qyzmetin atqarady, al Qytaidan Eýropaǵa qurlyq jolymen tasymaldanatyn júktiń 80 paiyzy Qazaqstan aýmaǵy arqyly ótedi.
"Bul mańyzdy artyqshylyqty biz tolyqqandy paidalanýǵa tiispiz. Bizdiń óz investitsiiamyz da "Bir beldeý, bir jol" bastamasymen strategiialyq turǵydan sabaqtas ári zamanaýi, mýltimodaldy, ekologiialyq turǵydan qaýipsiz jáne ornyqty infraqurylym qurýǵa baǵyttalǵan", – dedi prezident.
Qasym-Jomart Toqaev Qazaqstannyń ekonomikalyq kórsetkishterin de tanystyrdy. Byltyr elimizdiń ekonomikalyq ósimi 5,1 paiyzdy qurady. Bul álemdik ekonomikanyń boljamdy damý qarqynynan shamamen eki ese kóp. 2029 jylǵa qarai onyń kólemin eki ese ulǵaitýdy josparlanǵan.
"Qazaqstandaǵy ashyq esik saiasaty, mol resýrstar jáne liberaldy naryqtyq reformalar kóptegen sheteldik, sonyń ishinde qytailyq kompaniialardyń da nazaryn aýdardy. Osy oraida biz aziialyq seriktesterimizdi ekonomikamyzǵa investitsiia quiýǵa, ózara tiimdi yntymaqtastyqtyń jańa baǵyttaryn qarastyrýǵa shaqyramyz", – dedi Toqaev.
Aita keteri, Boao Aziia forýmy jyl saiyn Qytaidyń Hainan provintsiiasynda ótip turady. Biylǵy 23-shi basqosý "Aziia jáne álem: ortaq syn-qaterler, ortaq jaýapkershilik" taqyrybyna arnalap otyr. Al Qazaqstan prezidenti oǵan qurmetti qonaq retinde shaqyryldy.
