Prezident Qasym-Jomart Toqaev Qazaqstan Respýblikasy Qaýipsizdik Keńesi Apparatynyń qyzmetine qatysty jańa jarlyqqa qol qoidy, dep habarlaidy dalanews.kz.
Qujatqa sáikes, Qaýipsizdik Keńesi men onyń Apparaty týraly ereje bekitilip, Qaýipsizdik Keńesi Tóraǵasy orynbasarynyń ókilettikteri naqty aiqyndaldy.
Endi Qaýipsizdik Keńesi men onyń Apparaty jahandyq syn-qaterler men el ishindegi ózekti ahýalǵa jan-jaqty taldaý júrgizedi.
Qaýipsizdik Keńesi Tóraǵasy orynbasarynyń mindetine Keńes Tóraǵasynyń aktileri men tapsyrmalarynyń, sondai-aq Qaýipsizdik Keńesi qabyldaǵan sheshimderdiń tolyq ári ýaqtyly oryndalýyn baqylaý kiredi.
Sonymen qatar ol ulttyq qaýipsizdikti qamtamasyz etý, eldiń qorǵanys qabiletin nyǵaitý, zań men tártipti saqtaý baǵytynda jumys isteitin memlekettik organdar men uiymdardyń qyzmetin úilestiredi.
Orynbasardyń quzyryna aqparattyq jáne kiberqaýipsizdik, jasandy intellektini qoldaný, derbes derekterdi qorǵaý, sybailas jemqorlyq pen ekonomikalyq qylmysqa qarsy is-qimyl jáne azamattyq qorǵanys máseleleri de engizildi.
Budan bólek, Qaýipsizdik Keńesi Tóraǵasynyń orynbasary tiisti memlekettik organdar men uiymdardyń ózara is-qimylyn úilestiredi, halyqaralyq bailanystar ornatady jáne Qaýipsizdik Keńesi Apparatynyń jumysyn uiymdastyrady.
Jarlyqta Qaýipsizdik Keńesi Apparatynyń derbes memlekettik organ retinde Prezidentke tikelei baǵynatyny jáne esep beretini de kórsetilgen.
Apparat ulttyq qaýipsizdik salasyndaǵy táýekelderdi baqylaý júiesin jetildirý, memlekettik basqarýdyń ornyqtylyǵyn qamtamasyz etý, Qaýipsizdik Keńesiniń qyzmetine institýtsionaldyq qoldaý kórsetý jáne qabyldanǵan sheshimderdiń oryndalýyn qamtamasyz etý baǵytynda jumys isteidi.
Bul sharalar Qazaqstannyń egemendigi men táýelsizdigin, aýmaqtyq tutastyǵyn, konstitýtsiialyq qurylysyn jáne halyqaralyq arenadaǵy ulttyq múddelerin qorǵaýǵa baǵyttalǵan.
