Qasym-Jomart Toqaev pen Shavkat Mirziioev beiresmi kezdesý ótkizdi, – dep habarlaidy Dalanews.kz.
Qasym-Jomart Toqaev mártebeli meimannyń Almatyǵa saparmen kelgenine rizashylyq bildirip, mundai beiresmi kezdesýler jaqsy dástúrge ainalǵanyn aitty.
"Bul – baýyrlas, dostas memleketter arasyndaǵy yntymaqtastyqty damytý maqsatynda atqarylyp jatqan jumysty iskerlik sipatta taǵy bir talqylaýǵa oraily sát. Biz – odaqtas eldermiz. Eki el arasyndaǵy yqpaldastyq tutas Ortalyq Aziia óńirindegi jaǵdaiǵa tikelei áser etedi", – dedi Qazaqstan Prezidenti.
Memleket basshysy baýyrlas halyqtardy jaqyndastyrýǵa, aimaqtyń ornyqty jáne qaýipsiz damýyndaǵy ortaq maqsattardy ilgeriletýge Shavkat Mirziioevtiń zor úles qosqanyn atap ótti.
Ózbekstan prezidenti ekijaqty bailanystardy nyǵaitýdy kózdeitin búgingi kezdesýdiń mańyzyna toqtaldy.
"Meni ózińizdiń týǵan jerińiz, atap aitqanda, Almaty qalasynda dostyq peiilmen, eki halyqtyń dástúrine sai iltipatpen qarsy alyp jatqanyńyzǵa raqmet. Ózimniń jáne halqymnyń atynan rizashylyǵymdy bildiremin. Sońǵy jyldary qarym-qatynasymyz múldem jańa deńgeige kóterildi. Biz – odaqtaspyz. Ózara syilastyǵymyzdyń arqasynda kóptegen másele sheshimin taýyp keledi, ekeýara ýaǵdalastyqtardyń barlyǵy iske asyrylyp jatyr. Naqty nátijeler bar. Sizdi Qazaqstannyń zor tabystarǵa jetýimen quttyqtaimyn. Ekonomikalaryńyz damyp keledi, jetistikterińiz joǵary. Birinshi toqsandy 5,4 paiyzben qorytyndylap otyrsyzdar. Búgingi kezdesýimizdiń sipaty resmi bolmasa da, men úlken qurammen keldim. Degenmen árbir osyndai beiresmi júzdesýler bizdiń bailanystarymyzǵa, barlyq kelisimderimizdiń oryndalýyna tyń serpin beredi", – dedi Shavkat Mirziioev.
Taraptar saiasi, saýda-ekonomikalyq, kólik-logistikalyq, investitsiialyq, energetikalyq, sý sharýashylyǵy, ónerkásip kooperatsiiasy jáne týrizm salalaryndaǵy ózara yqpaldastyqtyń perspektivasyn jan-jaqty talqylady. Mádeni-gýmanitarlyq bailanystardy damytýǵa erekshe nazar aýdaryldy.
Sonymen qatar, óńirlik jáne halyqaralyq kún tártibiniń ózekti máseleleri qarastyryldy. Kezdesý sońynda prezidentter qazaq-ózbek strategiialyq seriktestigin odan ári tereńdetýge beiil ekenin rastady.
