Qasym-Jomart Toqaev pen Shahbaz Shariftiń kelissózderi eki el delegatsiialarynyń qatysýymen keńeitilgen quramda jalǵasty, dep habarlaidy Dalanews.kz.
Prezident Islamabadqa kelip, Pákistannyń bai tarihymen, mádeni murasymen jáne ǵasyrlar boiy qalyptasqan dástúrlerimen tanysýdy zor mártebe sanaitynyn atap ótti.
"Qazaqstan Prezidenti retinde Pákistanǵa birinshi ret memlekettik saparmen kelip otyrmyn. Bul sapar tarihi mánge ie jáne ýaqyt tezinen ótken seriktestigimizdiń mańyzdy kezeńi sanalady. Men buǵan senimdimin. Halyqtarymyzdyń Jibek joly arqyly jáne keń taralǵan islam órkenieti aiasynda ǵasyrlar boiy qalyptasqan dostyǵyn joǵary baǵalaimyn", – dedi Qasym-Jomart Toqaev.
Memleket basshysy atalǵan sapar diplomatiialyq qarym-qatynastyń ornaǵanyna 34 jyl tolýymen tuspa-tus kelgenine toqtalyp, munyń simvoldyq mánine nazar aýdardy.
Prezidenttiń aitýynsha, Pákistan – Qazaqstannyń táýelsizdik alǵan alǵashqy jyldardan beri Ońtústik Aziiadaǵy mańyzdy ári senimdi seriktesi.
Qasym-Jomart Toqaev búgin qol qoiylatyn Strategiialyq seriktestik ornatý týraly birlesken deklaratsiia ózara yqpaldastyqqa jol ashatyn mańyzdy tarihi mejeni aiqyndaitynyn aitty.
Memleket basshysynyń pikirinshe, Astana men Islamabad ekijaqty bailanystar men yntymaqtastyqqa tyń serpin beretin múmkindikke ie.
Prezident Pákistanǵa úlken delegatsiiamen jáne saýda-ekonomikalyq, investitsiialyq yntymaqtastyqty, sondai-aq basqa da basym salalardaǵy yqpaldastyqty arttyrýǵa baǵyttalǵan naqty usynystarmen kelgenin atap ótti.
Kezdesýde kólik baǵyttaryn ózara ushtastyrýǵa erekshe mán berildi. Bul – Qazaqstannyń negizgi basymdyqtarynyń biri. Elimiz Shyǵys pen Batysty, Soltústik pen Ońtústikti jalǵaityn toǵyz joldyń torabynda ornalasqan.
Prezidenttiń aitýynsha, Qazaqstan Ortalyq Aziia elderimen úilesimdi qarym-qatynas jasaý arqyly kólik-logistika salasyndaǵy naqty jobalardy júzege asyrýdy jalǵastyrady.
Qasym-Jomart Toqaev Pákistan Premer-ministrin Qazaqstanǵa memlekettik saparmen kelýge shaqyrdy. Sondai-aq búgingi ýaǵdalastyqtardyń júzege asyrylýyn pysyqtaý jáne ekijaqty qarym-qatynasty nyǵaitýdyń aldaǵy qadamdaryn aiqyndaý úshin mártebeli meimandy biyl qarsy alýǵa daiyn ekenin jetkizdi.
Kezdesýde atap ótilgendei, Qazaqstan men Pákistannyń kópjaqty alańdarda, sonyń ishinde BUU, ShYU jáne basqa da uiymdar aiasynda tyǵyz yqpaldastyqty jalǵastyrýy mańyzdy.
