Prezident Qasym-Jomart Toqaev VI Dúniejúzilik kóshpendiler oiyndarynda júlde alǵan qazaqstandyq sportshylar men olardyń bapkerlerin marapattady, dep habarlaidy dalanews.kz.
Táýelsizdik saraiynda ótken saltanatty jiynda Memleket basshysy ulttyq qurama múshelerin jarqyn jeńisterimen quttyqtap, olardyń Qazaqstannyń ulttyq sporttaǵy abyroiyn álemge tanytqanyn atap ótti.
«Álemniń 100-den astam elinen kelgen sportshylarmen básekege túsip, kók bairaǵymyzdy biikke kóterý – naǵyz ult perzentterine tán asyl qasiet. Ulttyq komandamyz el úmitin tolyǵymen aqtady dep aitsaq, ádilettikke sai sóz bolady. Men Prezident retinde barshańyzǵa Otanymyzǵa ákelgen rýhty jeńisterińiz úshin shynaiy rizashylyǵymdy bildiremin. Sizderge tutas halqymyz jankúier, tilekshi boldy», – dedi Qasym-Jomart Toqaev.
Prezident ulttyq quramanyń jalpykomandalyq esepte birinshi oryn alýyn el mereiin ósirgen mańyzdy jetistik dep baǵalady.
Qazaqstandyq sportshylar Kóshpendiler oiyndarynda jalpy 74 medal jeńip aldy. Onyń 32-si – altyn júlde.
«Osy tamasha jeńis qazaqtyń rýhy biik, jigeri myqty, naǵyz jeńimpaz ult ekenin taǵy bir márte aiqyn kórsetti», – dedi Memleket basshysy.
Qasym-Jomart Toqaev sporttyń basty mindetteriniń biri halyqtar arasyndaǵy ózara qurmet pen dostyqty nyǵaitý ekenin de atap ótti. Onyń aitýynsha, VI Dúniejúzilik kóshpendiler oiyndary joǵary deńgeide uiymdastyrylyp, jarystar ádil ótken.
Prezident osy oraida Qyrǵyzstan Prezidentine rizashylyǵyn bildirdi.
Saltanatty jiyn barysynda Kóshpendiler oiyndarynda el namysyn qorǵap, jeńis tuǵyrynan kóringen sportshylar men olardyń bapkerlerine memlekettik marapattar tabystaldy.
