Qazaqstan men Túrkiia Prezidentteri álemdegi ózekti máselelerge qatysty pikir almasty. Qazirgi kúrdeli kezeńde qarýly qaqtyǵystardyń ýshyǵýyna alańdaýshylyq bildiretinderin jetkizdi, dep habarlaidy Dalanews.kz.
Qazaqstan men Túrkiia prezidentteri barlyq janjal men qaqtyǵys diplomatiialyq kelissózder arqyly beibit jolmen sheshilýi qajet dep esepteidi. Bul rette Qasym-Jomart Toqaev Rejep Taiip Erdoǵannyń Resei men Ýkraina arasyndaǵy janjaldy retteý isindegi airyqsha rólin atap ótti.
"Bul – Sizdiń bedelińiz ben yqpalyńyzdyń aiqyn dáleli. Qos eldiń Birikken Ulttar Uiymyn reformalaý qajettiligi jónindegi ustanymy – ortaq. Qazaqstan árbir eldiń aýmaqtyq tutastyǵy saqtalýy kerek degen ustanymdy qorǵaidy. Qazaqstan men Túrkiia halyqaralyq arenadaǵy tiimdi yqpaldastyǵyn jalǵastyra beredi. Qazaqstan diplomatiiasy Túrki memleketteri Uiymynyń odan ári damýyna basa mán bermekshi. Osy baǵytta Túrkiia tarapymen birlesip jumys istei beremiz. Jahandyq turaqtylyq pen qaýipsizdikti qamtamasyz etý úshin kúsh-jigerimizdi biriktiremiz. Osy tusta Qazaqstannyń halyqaralyq bastamalaryna kórsetip jatqan qoldaýyna, sonyń ishinde Aziiadaǵy ózara yqpaldastyq jáne senim sharalary jónindegi Keńesti damytýdaǵy Túrkiianyń úlesine erekshe rizashylyq bildiremin", – dedi Memleket basshysy.
Túrkiia Prezidenti búgingi kelissózderdiń nátijeli bolǵanyn atap ótti.
"Qazaqstan – aimaqtaǵy ekonomikasy eń iri el jáne bizdiń negizgi seriktesimiz. Búgin biz qorǵanys pen energetikadan bastap, kólik, ǵylym men tehnologiiaǵa deiingi keń aýqymdy salalar boiynsha pikir almastyq. Biz taý-ken, sirek kezdesetin metaldar baǵytyndaǵy yntymaqtastyq múmkindikterin qarastyrdyq. Qazaqstan munaiyn Túrkiia arqyly álemdik naryqqa eksporttaý múmkindikterin talqyladyq. Tarihi Jibek jolynyń qazirgi balamasy – Transkaspii kólik baǵdaryn paidalaný jáne damytý joldaryn qarastyrdyq", – dedi Rejep Taiip Erdoǵan.
Túrkiia Prezidenti týrizm salasyndaǵy yntymaqtastyq perspektivasyna toqtalyp, túrik azamattaryna Qazaqstanda 90 kún vizasyz júrýge ruqsat berý týraly sheshim qabyldaǵany úshin Memleket basshysyna rizashylyǵyn bildirdi.
Sóz sońynda Qasym-Jomart Toqaev búgingi kelissózderdiń tabysty ótkeni úshin Rejep Taiip Erdoǵanǵa alǵys aityp, Túrkiia Prezidentin ózine yńǵaily ýaqytta Qazaqstanǵa saparmen kelýge shaqyrdy.
Sonymen qatar, Qasym-Jomart Toqaev Túrkiia Respýblikasynyń eń joǵary memlekettik nagradasy – "Devlet Nişani" ordenimen marapattaldy.
Qasym-Jomart Toqaev Túrkiia Respýblikasynyń eń joǵary memlekettik nagradasy – "Devlet Nişani" ordenin alý zor mártebe ekenin atap ótip, Prezident Rejep Taiip Erdoǵanǵa jáne barsha túrik halqyna shynaiy alǵysyn jetkizdi.
"Men otandyq nemese sheteldik orden jáne basqa da marapattardy qabyldaýdan bas tarttym. Alaida búgingi Sizdiń sheshimińizdiń mán-mańyzy erekshe deýge bolady. Bul – qazaq-túrik yntymaqtastyǵy jylnamasyndaǵy maǵynasy tereń tarihi oqiǵa. Siz osy sheshimińizben babalarymyzdyń amanatyna berik ekenińizdi taǵy bir márte kórsettińiz. Bizge asyl miras bolyp qalǵan baǵa jetpes muramyz – dostyq pen baýyrlastyq bailanystardy bekemdei tústińiz. Bul joǵary marapatty túrik eliniń barsha qazaq halqyna kórsetken erekshe qurmeti dep sanaimyn. Osy igi bastama – tamyry bir, dini men dili ortaq halyqtarymyz arasyndaǵy myzǵymas dostyqtyń aiqyn belgisi, qasterli qundylyqtarymyzdy dáripteitin mańyzdy qadam. Sondai-aq bul – qazaq-túrik strategiialyq yntymaqtastyǵyn odan ári nyǵaitýǵa degen ózara umtylystyń aiǵaǵy", – dedi Memleket basshysy.
Prezident áriptesi Rejep Taiip Erdoǵandy álemdik deńgeidegi kóregen, yqpaldy, asa kórnekti saiasatker, óńirlik jáne jahandyq turaqtylyq pen qaýipsizdikti nyǵaitýǵa ólsheýsiz úles qosyp otyrǵan tarihi tulǵa dep atady.
"Parasatty saiasatyńyz ben el múddesin ilgeriletý jolyndaǵy tabandy ári qajyrly eńbegińizdiń arqasynda osyndai abyroi biigine shyqtyńyz. Túrkiianyń búkil dúniejúzindegi bedeli eshkimniń kúmánin týdyrmaidy. Sizdiń basshylyǵyńyzben Túrkiianyń qol jetkizgen tabystary álemniń árbir túkpirinde moiyndalatyn boldy. Túrkiianyń álem moiyndaǵan jetistikteri, qarqyndy damýy, halyqaralyq qaýymdastyqtaǵy biik bedeli men zor yqpaly Sizdiń atyńyzben tikelei bailanysty. Búginde elińiz ekonomikalyq damýy boiynsha álemniń jetekshi 20 memleketiniń qatarynda. Sarapshylardyń boljamy boiynsha Túrkiianyń bolashaǵy – jarqyn, al dúniejúzindegi yqpaly arta bermek. Sizdiń kóshbasshylyǵyńyzben tuǵyry biik Túrkiia óziniń jańa altyn dáýirinde biik belesterdi baǵyndyra beretinine kámil senemin. Biz Túrkiianyń Qazaqstannyń Táýelsizdigin tanyǵan alǵashqy memleket bolǵanyn esh ýaqytta umytpaimyz. Bul egemen Qazaq eliniń jylnamasynda saqtalatyn óshpes tarihi derek", – dedi Prezident.
