Búgin Memleket basshysy «Birge – taza Qazaqstan» respýblıkalyq ekologıalyq aksıasynyń aıasynda Botanıkalyq baqta kóshet otyrǵyzyp, qalalyq senbilikke qatysty, – dep habarlaıdy Dalanews.kz.

Senbilik barysynda Prezıdent ekovolonterlermen jáne jastar kadrlyq rezerviniń múshelerimen áńgimelesti.

Qasym-Jomart Toqaev tabıǵatqa, jalpy ekologıaǵa uqypty qaraýdyń mańyzdylyǵy týraly aıtty.

Memleket basshysy Qazaqstan bolashaqta jasyl elge aınalýy kerek dep sanaıdy. «Tal degenimiz – qasıetti uǵym. Biz tal-terekterdi, tabıǵatty qorǵaýymyz kerek» dedi Prezıdent.

– Barshańyzǵa alǵys aıtamyn. Sizder Qazaqstannyń bolashaǵysyzdar. Jańa Qazaqstandy el bolyp, ult bolyp, memleket bolyp, bárimiz birge qurýǵa kirisýimiz qajet. Amanshylyq bolsa, Ekinshi respýblıkany órkendetemiz. Jalpy keleshegimiz jaqsy, aıqyn, jarqyn bolatynyna eshqandaı kúmánim joq. Memleketimizdiń bolashaǵy jastardyń qolynda. Men sizderge senemin, – dedi Qasym-Jomart Toqaev.

Eriktiler men Prezıdenttik jastar kadrlyq rezerviniń músheleri ekologıalyq máseleler men bastamalarǵa únemi qoldaý bildiretini úshin Memleket basshysyna alǵys aıtty.

Aksıaǵa qatysqandar 15 túp jóke jáne 35 túp emen kóshetin ekti.